(រ៉ូម)៖ ក្រសួងការបរទេសអ៉ីតាលី បានឱ្យដឹងថា ទីក្រុងរ៉ូម កំពុងធ្វើការយ៉ាងជិតស្និទ្ធជាមួយគណៈកម្មាការអឺរ៉ុប ដើម្បីឱ្យជំរុញសហរដ្ឋអាមេរិកពិចារណាឡើងវិញ នូវពន្ធប្រឆាំងការលក់បង្ខូចតម្លៃលើការនាំចូល Pasta ដែលនឹងធ្វើឱ្យ Pasta ឡើងថ្លៃទ្វេដង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៦ ខែតុលា ឆ្នាំ ២០២៥។

ការសម្រេចដាក់ពន្ធបន្ថែមចំនួន ៩១.៧៤ភាគរយ កើតចេញបន្ទាប់ពីក្រសួងពាណិជ្ជកម្មអាមេរិក រកឃើញថា​ក្រុមអ្នកផលិតធំៗរបស់អ៉ីតាលី បានលក់ Pasta ក្នុងតម្លៃទាបពេកដែលមិនយុត្តិធម៌ នៅចន្លោះខែកក្កដាឆ្នាំ ២០២៣ ដល់ខែមិថុនា ២០២៤។ នៅក្នុងសេចក្តីថ្លែងការណ៍របស់ខ្លួន ក្រសួងការបរទេសអ៉ីតាលី បានជំទាស់ទៅនឹងការរកឃើញ និងដាក់ពន្ធបន្ថែមថ្មីនេះ ហើយថាកំពុងជួយដល់ក្រុមហ៊ុនការពារសិទ្ធិពួកគេ តាមរយៈស្ថានទូតប្រចាំទីក្រុងវ៉ាស៉ីនតោន។

ជាមួយនិងការនាំចេញគិតជាទឹកប្រាក់ជិត ៨០០លានដុល្លារ សហរដ្ឋអាមេរិកគឺជាទីផ្សារនាំចេញមួយ ក្នុងចំណោមទីផ្សារនាំចេញកំពូលទាំង ៣ របស់អ៉ីតាលីសម្រាប់ Pasta ដែលជាផលិតផលអាហារតំណាងប្រទេស។ ការនាំចេញ Pasta សរុបរបស់អ៉ីតាលីកាលពីឆ្នាំ ២០២៤ មានតម្លៃជាង ៤.៧០ពាន់លានដុល្លារ ដោយការលក់ទៅឱ្យបរទេសមានជិត ២.៥លានតោន៕