(ញូវយ៉ក)៖ អ្នកនាំពាក្យអង្គការសហប្រជាជាតិ (UN) លោក Stephane Dujarric បានឱ្យដឹងថា បុគ្គលិក UN ៩នាក់ទៀត ត្រូវបានឃុំខ្លួនដោយក្រុមហ៊ូទី នៅប្រទេសយេម៉ែន ដែលនាំឱ្យចំនួនបុគ្គលិកដែលត្រូវគេឃុំខ្លួនតាមអំពើចិត្ត មានដល់ទៅ ៥៣នាក់ គិតចាប់តាំងពីឆ្នាំ ២០២១។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៧ ខែតុលា ឆ្នាំ ២០២៥។

លោក Dujarric បញ្ជាក់ថា «អគ្គលេខាធិការ ថ្កោលទោសយ៉ាងខ្លាំងចំពោះការបន្តការឃុំខ្លួន ដោយបំពានលើបុគ្គលិក និងដៃគូរបស់ខ្លួន ក៏ដូចជាការចាប់យកដោយខុសច្បាប់នូវទីតាំង និងទ្រព្យសម្បត្តិរបស់ UN នៅតំបន់ដែលស្ថិតក្រោមការគ្រប់គ្រងហ៊ូទី»។

លោក Dujarric មិន​បាន​បញ្ជាក់​អំពី​ពេលវេលា ឬ​កាលៈទេសៈ​នៃ​ការ​ឃុំ​ខ្លួនថ្មីៗនេះ​ទេ។ ប៉ុន្តែកាលពីខែសីហា ហ៊ូទីបានវាយឆ្មក់លើបរិវេណស្នាក់ការ UN ក្នុងទីក្រុង Sanaa ហើយបានឃុំខ្លួនបុគ្គលិកយ៉ាងហោចណាស់ ១៨នាក់ បន្ទាប់ពីមានការវាយប្រហាររបស់អ៉ីស្រាអែល ដែលបានសម្លាប់នាយករដ្ឋមន្ត្រី និងរដ្ឋមន្ត្រីមួយចំនួនទៀតនៃក្រុមនេះ។

មន្ត្រីហ៊ូទីនិយាយថា អភ័យឯកសិទ្ធិផ្លូវច្បាប់នៃបុគ្គលិក UN មិនគួរត្រូវបានប្រើដើម្បីការពារសកម្មភាពចារកម្មនោះទេ។ ហ៊ូទីចោទប្រកាន់ UN ថាលម្អៀងទាក់ទងនឹងវិធានការផ្លូវច្បាប់ ប្រឆាំងសកម្មភាពចារកម្ម ខណៈបរាជ័យក្នុងការដោះស្រាយ ការវាយប្រហាររបស់អ៉ីស្រាអែល៕