(វ៉ាស៉ីនតោន)៖ ប្រធានាធិបតីអាមេរិក លោក​ ដូណាល់ ត្រាំ បាននិយាយថា លោកចង់ដឹងថា អ៊ុយក្រែននឹងយកមីស៉ីលរយៈចម្ងាយឆ្ងាយ Tomahawk ទៅប្រើប្រាស់ដោយរបៀបណាឱ្យប្រាកដ មុនពេលសម្រេចចិត្តផ្តល់ពួកវា ពីព្រោះលោកមិនចង់ឱ្យសង្រ្គាមរុស្ស៉ីនៅអ៊ុយក្រែន កាន់តែកើនឡើងថែមទៀតទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៧ ខែតុលា ឆ្នាំ ២០២៥។

លោក ត្រាំ គូសបញ្ជាក់ថា «ខ្ញុំគិត ថាខ្ញុំត្រូវតែដឹងជាមុនសិនថាពួកគេ (អ៊ុយក្រែន) នឹងធ្វើយ៉ាងមិច។ តើពួកគេបញ្ជូនទៅណា? ខ្ញុំត្រូវតែសួរឱ្យដឹងច្បាស់។ ខ្ញុំមិនបង្កើនភាពតានតឹងក្នុងសង្រ្គាមនោះទេ»។

មីស៉ីល Tomahawk អាចបាញ់បានចម្ងាយ ២ ៥០០គីឡូម៉ែត្រ ដែលអាចបាញ់ចូលជ្រៅទៅក្នុងទឹកដីរុស្ស៉ី។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានស្នើឱ្យសហរដ្ឋអាមេរិកលក់មីស៉ីលនេះ ទៅឱ្យប្រទេសអឺរ៉ុប ដែលអាចនឹងបញ្ជូនវាបន្តមកអ៊ុយក្រែន៕