(មូស្គូ)៖ ក្រសួងមហាផ្ទៃរុស្ស៉ី បានឱ្យដឹងកាលពីថ្ងៃអាទិត្យ ទី២៦ ខែតុលាថា មនុស្សច្រើនជាង ៨០នាក់ ត្រូវបាននាំខ្លួនមកកាន់ប៉ុស្តប៉ូលិសដើម្បីសួរចម្លើយ បន្ទាប់ពីមានហេតុការណ៍វាយដំគ្នានៅតាមដងផ្លូវ រវាងជនអន្តោប្រវេសន៍ និងអ្នកស្រុកក្នុងទីក្រុងមូស្គូ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

មនុស្ស ១៩នាក់ត្រូវបានចាប់ខ្លួនពីបទញុះញង់បង្កអំពើហិង្សា ដោយពួកគេគឺជនអន្តោប្រវេសន៍មានសញ្ជាតិរុស្ស៉ី និងអាចនឹងត្រូវដកហូតសញ្ជាតិវិញ។ តាមអ្នកនាំពាក្យក្រសួងមហាផ្ទៃ លោកស្រី Irina Volk «ពលរដ្ឋបរទេសទាំងនោះ មិនត្រូវជាប់ពន្ធនាគារទេ តែត្រូវនិរទេស ហើយហាមឃាត់មិនឱ្យចូលមកប្រទេសរុស្ស៉ីវិញឡើយ»។

គួរបញ្ជាក់ថា ចំណាកស្រុក បានក្លាយជាបញ្ហានយោបាយក្នុងស្រុកធំមួយសម្រាប់រុស្ស៉ី។ ជនអន្តោប្រវេសន៍ប្រហែល ៦.៣លាននាក់ បានមកដល់រុស្ស៉ីក្នុងឆ្នាំ ២០២៤ ដោយប្រហែលពាក់កណ្តាលនៃចំនួនសរុប គឺមកពីអ៊ូសបេគីស្ថាន តាជីគីស្ថាន និងកៀហ្ស៉ីស៉ីស្ថាន។ ខណៈសេដ្ឋកិច្ចក្នុងស្រុករបស់រុស្ស៉ី ពឹងផ្អែកលើកម្លាំងពលកម្មតម្លៃថោកមកពីប្រទេសទាំងនោះ ពិសេសវិស័យឧស្សាហកម្មសំណង់ និងទំនិញប្រើប្រាស់ ពលរដ្ឋរុស្ស៉ីជាច្រើនបានប្រតិកម្មប្រឆាំងទៅនឹងអ្វីដែលពួកគេនិយាយថា ជាការហូរចូលយ៉ាងច្រើននៃមនុស្សមានចំណេះដឹងតិចតួចអំពីទំនៀមទម្លាប់ ឬវប្បធម៌រុស្ស៉ី៕