(ប៊ូសាន, កូរ៉េខាងត្បូង)៖ តាមប្រព័ន្ធផ្សព្វផ្សាយរដ្ឋចិន មេដឹកនាំចិន និងកាណាដា បានបើកកិច្ចពិភាក្សាលើកដំបូង ក្នុងរយៈពេល ៨ឆ្នាំ នាថ្ងៃសុក្រ ទី៣១ ខែតុលានេះ ដោយលោក ស៉ី ជីនពីង បានជួបនាយករដ្ឋមន្រ្តី លោក Mark Carney ក្នុងប្រទេសកូរ៉េខាងត្បូង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ទំនាក់ទំនងកាណាដាជាមួយចិន គឺជាទំនាក់ទំនងដ៏ដុនដាបមួយ ធៀបនឹងប្រទេសលោកខាងលិចដទៃទៀត ជាពិសេសចាប់តាំងពី​ឆ្នាំ២០១៨មក ប៉ុន្តែប្រទេសទាំងពីរ នាពេលនេះកំពុងទទួលរងផលប៉ះពាល់ធ្ងន់ដូចគ្នា ពីសង្រ្គាមពន្ធគយអាមេរិក ទោះបីលោក ស៉ី ទើបតែមានកិច្ចព្រមព្រៀងជាមួយ ប្រធានាធិបតីអាមេរិក លោក ដូណាល់ ត្រាំ អំឡុងកិច្ចប្រជុំទ្វេភាគី កាលពីថ្ងៃព្រហស្បតិ៍ក៏ដោយ។

កាណាដា ស្ថិតក្នុងចំណោមប្រទេសផលិតប្រេងកាណូឡាកំពូលៗរបស់ពិភពលោក ដែលជាដំណាំប្រេងត្រូវបានប្រើ សម្រាប់ផលិតប្រេងចម្អិនអាហារ ចំណីសត្វ និងប្រេងឥន្ធនៈជីវម៉ាស៊ូត។ កាលពីខែកក្កដា លោក Carney បានប្រកាសដាក់ពន្ធបន្ថែម ២៥ភាគរយលើការនាំចូលដែកថែបរបស់ចិន។ នៅខែបន្ទាប់ ទីក្រុងប៉េកាំង បានដាក់ពន្ធគយបណ្តោះអាសន្នចំនួន ៧៥.៨ ភាគរយលើការនាំចូលកាណូឡារបស់កាណាដា៕