(ហ្សាការតា)៖ មន្ត្រីក្នុងតំបន់ម្នាក់បានប្រកាសឲ្យដឹងនៅថ្ងៃចន្ទថា មនុស្សយ៉ាងហោចណាស់ ១៥នាក់ ដែលភាគច្រើនជាកុមារ បានបាត់ខ្លួនហើយទំនងជាបានស្លាប់ បន្ទាប់ពីគ្រោះទឹកជំនន់ និងការបាក់ដីបានវាយប្រហារតំបន់ Papua ភាគខាងកើតប្រទេសឥណ្ឌូណេស៊ី ក្រោយមានភ្លៀងធ្លាក់ខ្លាំង។

ស្នងការនគរបាលតំបន់ Nduga លោក Alfredo Rumbiak បានបញ្ជាក់ប្រាប់ទីភ្នាក់ងារព័ត៌មាន Reuters ថា ក្នុងចំណោមជនរងគ្រោះទាំងនោះ ១៣នាក់គឺជាកុមារដែលមានអាយុចន្លោះពី ៨ ទៅ ១៧ឆ្នាំ។ លោកបានឱ្យដឹងថា កុមារទាំងនោះកំពុងធ្វើដំណើរត្រឡប់មកផ្ទះវិញ បន្ទាប់ពីលេងបាល់ទះ ហើយបានព្យាយាមឆ្លងកាត់ទន្លេមួយ ខណៈពេលដែលគ្រោះទឹកជំនន់បានកើតឡើង។

កិច្ចប្រឹងប្រែងស្វែងរក និងជួយសង្គ្រោះកំពុងតែជួបប្រទះឧបសគ្គ ដោយសារតែស្ថានភាពភូមិសាស្ត្រពិបាកធ្វើដំណើរ ដែលជាតំបន់ភ្នំ។ លើសពីនេះទៅទៀត តំបន់នោះត្រូវបានចាត់ថ្នាក់ជា «តំបន់ក្រហម» ផ្នែកសន្តិសុខ ដែលធ្វើឱ្យប្រតិបត្តិការជួយសង្គ្រោះកាន់តែមានភាពស្មុគស្មាញ។

គួរបញ្ជាក់ថា តំបន់ Papua តែងតែមានអសន្តិសុខ ដោយសារក្រុមផ្តាច់ខ្លួនបានធ្វើការតស៊ូដើម្បីឯករាជ្យ ចាប់តាំងពីតំបន់នេះស្ថិតក្រោមការគ្រប់គ្រងរបស់ឥណ្ឌូណេស៊ីកាលពីឆ្នាំ១៩៦៩។ លោក Rumbiak បានបញ្ជាក់ថា ទីតាំងដែលកើតមានការបាក់ដីនេះ គឺស្ថិតនៅក្នុងតំបន់តែមួយ ដែលក្រុមផ្តាច់ខ្លួនធ្លាប់បានសម្លាប់កម្មករជាច្រើននាក់ក្នុងឆ្នាំ២០១៨៕