(កដ្ឋមណ្ឌូ)៖ អាជ្ញាធរនេប៉ាល់ បានឱ្យដឹងថា មនុស្សយ៉ាងហោច៣នាក់បានស្លាប់ និង៤នាក់បានបាត់ខ្លួន បន្ទាប់ពីផ្ទាំងទឹកកក បានរអិលបាក់ចំលើជំរំក្រុមអ្នកឡើងភ្នំ នៅភាគខាងកើតប្រទេសនេប៉ាល់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី៤ ខែវិច្ឆិកា ឆ្នាំ២០២៥។

មន្រ្តីប៉ូលិសជាន់ខ្ពស់នេប៉ាល់មួយរូប បានប្រាប់ថា ការររអិលបាក់ផ្ទាំងទឹកកកបានវាយប្រហារ ជំរំអ្នកឡើងភ្នំមួយក្រុមមានគ្នា១២នាក់ នៅលើភ្នំ Yalung Ri ដែលមានកម្ពស់៥៦៣០ម៉ែត្រ និងស្ថិតក្នុងជួរភ្នំហិម៉ាល័យ កាលពីវេលាព្រឹកថ្ងៃចន្ទ។ យោងតាមមន្រ្តីប៉ូលិសដដែល ក្នុងចំណោមអ្នកស្លាប់ទាំង៣នាក់ គឺ២នាក់ជាជនជាតិនេប៉ាល់ និងម្នាក់ទៀតជាជនបរទេស ហើយអ្នកបាត់ខ្លួន គឺជាជនបរទេសដូចគ្នា។ យ៉ាងណាមិញ សញ្ជាតិនៃជនបរទេសទាំងនោះ គឺមិនត្រូវបានបញ្ជាក់ឡើយ។ ដោយឡែក ប្រព័ន្ធផ្សព្វផ្សាយដទៃទៀត បាននាំគ្នារាយការណ៍ថា មនុស្សរហូតដល់៧នាក់បានស្លាប់ ក្នុងហេតុការណ៍នោះ ហើយជនជាតិអាមេរិក អ៉ីតាលី និងកាណាដា ស្ថិតក្នុងចំណោមអ្នកស្លាប់។

គួរបញ្ជាក់ថា ប្រទេសនេប៉ាល់ ដែលជាកន្លែងមានកំពូលភ្នំខ្ពស់ៗបំផុតចំនួន៨ ក្នុងចំណោម១០របស់ពិភពលោក ក្នុងនោះរួមមានទាំងភ្នំ Everest តែងតែស្វាគមន៍អ្នកឡើងភ្នំរាប់រយនាក់ ជារៀងរាល់ឆ្នាំ។ កាលពីសប្តាហ៍មុន ព្យុះស៉ីក្លូន Montha បានបង្កឱ្យ​មានភ្លៀងធ្លាក់និងព្រិលធ្លាក់ខ្លាំង នៅពាសពេញនេប៉ាល់ ជាហេតុនាំឱ្យអ្នកឡើងភ្នំនិងអ្នកទេសចរ ត្រូវជាប់ខ្លួនទៅណាមិនរួច នៅតាមច្រកផ្លូវឡើងភ្នំដែលពេញនិយម លើជួរភ្នំហិម៉ាល័យ។ រីឯកាលពីថ្ងៃចន្ទ ក្រុមមន្រ្តីទេសចរ បានឱ្យដឹងថា អ្នកឡើងភ្នំជនជាតិអ៉ីតាលី២នាក់ ក៏បានបាត់ខ្លួនផងដែរ ពេលព្យាយាមឡើងកំពូលភ្នំដាច់ស្រយាលមួយកន្លែង នៅភាគខាងលិចនេប៉ាល់៕