(Reuters)៖ យោធាជប៉ុន នៅថ្ងៃពុធ ទី៥ ខែវិច្ឆិកា បានដាក់ពង្រាយទាហានទៅកាន់តំបន់ភ្នំភាគខាងជើងនៃប្រទេស ដើម្បីជួយចាប់សត្វខ្លាឃ្មុំ បន្ទាប់ពីមានសំណើបន្ទាន់មួយពីក្រុមមន្ត្រីមូលដ្ឋានដែល កំពុងជួបការលំបាកក្នុងការដោះស្រាយការវាយប្រហារជាបន្តបន្ទាប់ពីសត្វខ្លាឃ្មុំ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ប្រតិបត្តិការចាប់សត្វខ្លាឃ្មុំបានចាប់ផ្ដើមធ្វើឡើងនៅក្នុងទីក្រុង Kazuno ជាទីដែលអ្នកស្រុករស់នៅទីនោះត្រូវបានជូនដំណឹងជាច្រើនសប្ដាហ៍មកហើយ ឱ្យចៀសវាងការធ្វើដំណើរចូលក្បែរតំបន់ព្រៃភ្នំ និងត្រូវស្នាក់នៅក្នុងផ្ទះពីព្រោះអាចមានសត្វខ្លាឃ្មុំចូលទៅក្បែរផ្ទះរបស់ពួកគេដើម្បីរកចំណី។ តាមក្រសួងបរិស្ថានជប៉ុន មានករណីវាយប្រហារដោយសត្វខ្លាឃ្មុំជាង ១០០លើកបានកើតឡើងនៅទូទាំង ប្រទេសជប៉ុន ចាប់តាំងពីខែមេសា ឆ្នាំ២០២៥មក និងមានមនុស្ស១២នាក់បានស្លាប់។ ២ភាគ៣នៃអ្នកស្លាប់ត្រូវបានរាយការណ៍នៅក្នុងខេត្ត Akita ជាទីដែលទីក្រុង Kazuno ស្ថិតនៅ។

ប្រឈមនឹងការកើនឡើងការប្រទះឃើញសត្វខ្លាឃ្មុំដល់ទៅ៦ដងក្នុងឆ្នាំនេះ ឬស្មើ៨០០០លើក ក្រុមមន្ត្រីនៅក្នុងខេត្ត Akita បានស្នើឱ្យសុំការគាំទ្រពីកងកម្លាំងស្វ័យការពារជប៉ុនកាលពីសប្ដាហ៍មុន។ រថយន្ដដឹកកងទ័ព រថយន្ត jeeps ជាច្រើនគ្រឿង និងទាហានរាប់សិបនាក់ បានប្រមូលផ្ដុំគ្នានៅព្រឹកថ្ងៃពុធនេះ ក្នុងទីក្រុង Kazuno។ ទាហានទាំងនេះនឹងជួយគាំទ្រដល់ការដឹកជញ្ជូន ដំឡើង និងតាមឃ្លាំមើលការដាក់អន្ទាក់ចាប់សត្វខ្លាឃ្មុំ ប៉ុន្តែការសម្លាប់សត្វខ្លាឃ្មុំមួយចំនួននឹងត្រូវប្រគល់តួនាទីទៅឱ្យក្រុមអ្នកប្រមាញ់៕