(ប៉េកាំង)៖ ខណៈពេលដើរចូលពន្លាជាតិកម្ពុជា ក្នុងសាលតាំងពិព័រណ៍ជាតិចម្រុះរបស់ពិព័រណ៍នាំចូលចិនអន្តរជាតិលើកទី៨ ក៏អាចឃើញផ្លែស្វាយស្រស់ធំៗ និងដំណាប់ស្វាយពណ៌លឿងថ្លា ដាក់តាំងបង្ហាញយ៉ាងស្អាត ព្រមទាំងបានបញ្ចេញក្លិនប្រហើរ ទាក់ទាញអ្នកទស្សនាភ្លក្សរសជាតិនិងសួរពត៌មាន ។

ប្រធាននាយកដ្ឋានកិច្ចការពិព័រណ៍ នៃក្រសួងពាណិជ្ជកម្មកម្ពុជាបានធ្វើបទបង្ហាញថា ពិព័រណ៍នាំចូលចិនអន្តរជាតិ ធ្វើឱ្យផ្លែស្វាយរបស់កម្ពុជា ដើរចូល “គន្លងល្បឿនលឿន”ទៅកាន់ទីផ្សារចិន។ ដោយឡែក ដំណាប់ស្វាយដែលធ្វើពីស្វាយកែវរមៀត ជាផលិតផលតាំងពិព័រណ៍មានភាពតំណាងក្នុងពន្លាជាតិកម្ពុជា។ បន្ទាប់ពីផ្លែស្វាយកម្ពុជាទទួលបាន ការអនុញ្ញាតិឱ្យចូលទៅកាន់ ប្រទេសចិន កម្ពុជាបានទទួលការបញ្ជាទិញកាន់តែច្រើនពីមួយឆ្នាំទៅមួយឆ្នាំ។

ឯកឧត្តម ប៉ែន សុវិជាតិ រដ្ឋលេខាធិការនិងជាអ្នកនាំពាក្យក្រសួងពាណិជ្ជកម្មកម្ពុជាបានថ្លែងថា ចាប់តាំងពីចិនបានរៀបចំ ធ្វើពិព័រណ៍នាំចូលចិនអន្តរជាតិ កាលពីឆ្នាំ២០១៨មក កម្ពុជាបានចូលរួមការតាំងពិព័រណ៍ជាប់រហូត ដើម្បីបង្ហាញផលិតផល និងសេវាកម្មមានគុណភាពទៅកាន់ អ្នកប្រើប្រាស់ចិននិងអន្តរជាតិ ក៏ដូចជាពាណិជ្ជករចូលរួមការតាំងពិព័រណ៍ផងដែរ។ ជាពិសេស គឺពិព័រណ៍នាំចូលចិនអន្តរជាតិឆ្នាំនេះ បានបង្ហាញឱ្យឃើញនូវពាក្យសន្យាយ៉ាងមុតមាំរបស់ចិន ដែលនឹងខិតខំប្រឹងប្រែង ជំរុញពាណិជ្ជកម្មសកល គាំពារពហុភាគីនិយម និងពង្រីកការបើកទូលាយចំពោះបរទេសថែមមួយកម្រិតទៀត។

ប្រឈមនឹងនិន្នាការបញ្ច្រាសនៃឯកតោភាគីនិយមនិងការការពារនិយម ប្រទេសចិនបានបញ្ចេញសញ្ញាយ៉ាងច្បាស់នូវការពង្រីក ការបើកទូលាយតាមរយៈពិព័រណ៍នាំចូលចិនអន្តរជាតិ។ អាកប្បកិរិយាបើកចំហរបស់ចិនក៏ទទួលបានប្រតិកម្មយ៉ាងខ្លាំងពី សំណាក់សហគមន៍អន្តរជាតិ តាមរយៈតួលេខជាក់ស្តែងក្នុងការតាំងពិព័រណ៍លើកនេះ។ ឆ្នាំនេះ មានប្រទេស តំបន់និងអង្គការអន្តរជាតិចំនួន១៥៥ បានចូលរួមពិព័រណ៍នាំចូលចិនអន្តរជាតិ សហគ្រាសបរទេសចំនួន៤១០៨ បានចូលរួមការតាំងពិព័រណ៍ ទំហំសាលពិព័រណ៍មានចំនួនលើសពី៤៣ម៉ឺនម៉ែត្រក្រឡា ទំហំសាលពិព័រណ៍និងសហគ្រាសសរុប សុទ្ធតែបានបំបែកកំណត់ត្រាថ្មីក្នុងប្រវតិ្តសាស្ត្រ។

ខណៈពេលផ្តល់បទសម្ភាសន៍ជាមួយអ្នកសារព័ត៌មាន សហគ្រាសបរទេសជាច្រើនបានបញ្ជាក់ថា ពោរពេញទៅដោយជំនឿចិត្ត ចំពោះទីផ្សារចិន។ លោក លូ ហៃទីង ប្រធានស្តីទីនៃសភាពាណិជ្ជកម្មចិនរបស់ប្រទេសម៉ាឡេស៊ីបានថ្លែងថា ពិព័រណ៍នាំចូលចិនអន្តរជាតិបានជំរុញការច្នៃប្រឌិតថី្មលើវិស័យកិច្ចសម្រួលពាណិជ្ជកម្ម ឧទាហរណ៍រូបមន្តថ្មីដូចជា “វេទិកាធុរកិច្ចអេឡិចត្រូនិចឆ្លងដែន”ជាដើម ដែលបានផ្តល់មធ្យោបាយមានប្រសិទ្ធភាព និងភាពរស់រវើកកាន់តែខ្ពស់ សម្រាប់ឱ្យសហគ្រាសបរទេសធុនមធ្យម និងតូចត្រួសត្រាយទីផ្សារចិន។ យន្តការថ្មីទាំងនេះ ធ្វើឱ្យសហគ្រាស ដែលមានទ្រង់ទ្រាយខុសគ្នា និងក្នុងដំណាក់កាលអភិវឌ្ឍន៍ខុសគ្នា សុទ្ធតែមានឱកាសចូលក្នុងទីផ្សារចិន ប្រកបដោយភាពងាយស្រួល ដើម្បីស្វែងរកចន្លោះកិច្ចសហប្រតិបតិ្តការជាបន្តបន្ទាប់។

«របាយការណ៍ស្តីពីភាពបើកទូលាយសកលឆ្នាំ២០២៥» ថ្មីបំផុតបានបង្ហាញថា ចិនជាទីផ្សារមួយក្នុងចំណោមទីផ្សារ មានផលចំណេញខ្ពស់បំផុតផ្នែកវិនិយោគនៅទូទាំងពិភពលោក ក្នុងរយៈពេលជិត៥ឆ្នាំចុងក្រោយនេះ អត្រាផលចំណេញ ផ្នែកវិនិយោគផ្ទាល់របស់ពាណិជ្ជករបរទេស ប្រហែលមាន៩ភាគរយ ។ ទីផ្សារធំធេង ខ្សែសង្វាក់ឧស្សាហកម្មយ៉ាងពេញលេញ និងបរិយាកាសច្នៃប្រឌិតថ្មីដែលមានលំដាប់ថ្នាក់ កាន់តែខ្ពស់របស់ប្រទេសចិន បាននាំមកនូវឧត្តមភាពខាងដើមទុន ការលើកកម្ពស់ប្រសិទ្ធភាព និងភាគលាភខាងការច្នៃប្រឌិតថ្មីដល់សហគ្រាសពហុជាតិ ។

«របាយការណ៍ស្តីពីចក្ខុវិស័យនៅចិនរបស់សហគ្រាសពហុជាតិឆ្នាំ២០២៥» ដែលក្រុមហ៊ុន KPMG ចេញផ្សាយក្នុងអំឡុងពិព័រណ៍នាំចូលចិនអន្តរជាតិបានបង្ហាញថា ក្នុងរយៈពេល៦ខែចុងក្រោយនេះ ការរួមបញ្ចូលគ្នានិងទិញយក របស់ក្រុមហ៊ុនពហុជាតិនៅប្រទេសចិនមានចំនួនកាន់តែច្រើនយ៉ាងច្បាស់លាស់ ដែលបានឈានចូលកម្រិតស្មើមុននឹងឆ្នាំ២០១៩ ។ ក្រុមហ៊ុនពហុជាតិភាគច្រើនមានគម្រោងរក្សាឬបន្ថែមការបណ្តាក់ទុននៅចិននៅឆ្នាំ២០២៥ ហើយរំពឹងទុករក្សាកម្លាំងប្រកួតប្រជែង នៅទីផ្សារចិន ។

ពិតមែនតែម៉ាក្រូសេដ្ឋកិច្ចសកលនៅតែមានភាពមិនប្រាកដប្រជា ប៉ុន្តែសហគ្រាសពហុជាតិភាគច្រើន នៅតែមានជំនឿចិត្តទៅលើទីផ្សារចិន ។ រីឯពិព័រណ៍នាំចូលចិនអន្តរជាតិដែលរៀបចំរៀងរាល់មួយឆ្នាំម្ដង មិនត្រឹមតែជាព្រឹតិ្តការណ៍បញ្ជាទិញដ៏ធំធេងប៉ុណ្ណោះទេ ក៏ជាវេទិកាសហប្រតិបតិ្តការមួយដែលផ្តោតសំខាន់ទៅលើ កិច្ចសហប្រតិបតិ្តការ ការច្នៃប្រឌិតថ្មីនិងឈ្នះ-ឈ្នះផងដែរ ។ តាមរយៈសកម្មភាពជាក់ស្តែង ប្រទេសចិនបានបញ្ចេញ សញ្ញាយ៉ាងច្បាស់ថា នឹងចែករំលែកកាលានុវត្តភាពនិងអភិវឌ្ឍន៍ជាមួយពិភពលោក ប្រការនេះមិនត្រឹមតែនឹងបង្កើន សមត្ថភាពទប់ទល់នឹងកម្លាំងសម្ពាធ សម្រាប់ការអភិវឌ្ឍសេដ្ឋកិច្ចរបស់ខ្លួនតែប៉ុណ្ណោះ ក៏នឹងបង្កើតស្ពានធ្វើ កិច្ចសហប្រតិបតិ្តការឈ្នះ-ឈ្នះសម្រាប់ឱ្យពិភពលោក ហើយនឹងបង្កើតឱកាសថ្មីកាន់តែច្រើន សម្រាប់ការអភិវឌ្ឍសកលផងដែរ៕

វិទ្យុមិត្តភាពកម្ពុជាចិន