(អ៊ីស្លាម៉ាបាដ)៖ ករណីបំផ្ទុះគ្រាប់បែកអត្តឃាតមួយបានសម្លាប់មនុស្សយ៉ាងហោចណាស់ ១២ នាក់ និងធ្វើឱ្យ ២៧ នាក់ផ្សេងទៀតរងរបួស នៅខាងក្រៅអគារតុលាការមួយក្នុងរដ្ឋធានីអ៊ីស្លាម៉ាបាដ នៅថ្ងៃអង្គារ ទី១១ ខែវិច្ឆិកា ឆ្នាំ២០២៥នេះ។

បើយោងតាមសេចក្តីរាយការណ៍របស់ទីភ្នាក់ងារសារព័ត៌មាន Reuters បានឱ្យដឹងថាហេតុការណ៍នេះបានកើតឡើងតែប៉ុន្មានម៉ោងប៉ុណ្ណោះ បន្ទាប់ពីករណីស្រដៀងគ្នាមួយទៀតបានសម្លាប់មនុស្សបីនាក់នៅភាគពាយព្យនៃប្រទេស។

រដ្ឋមន្ត្រីក្រសួងមហាផ្ទៃប៉ាគីស្ថាន លោក ម៉ូសិន ណាក់វី (Mohsin Naqvi) បានបញ្ជាក់ថា ជនបំផ្ទុះគ្រាប់បែកនៅតុលាការ បានព្យាយាមដើរចូលទៅក្នុងអគារ ប៉ុន្តែបានបំផ្ទុះគ្រឿងផ្ទុះរបស់ខ្លួននៅខាងក្រៅ ជិតរថយន្តនគរបាលមួយគ្រឿង បន្ទាប់ពីរង់ចាំនៅទីនោះអស់រយៈពេល ១០ ទៅ ១៥នាទី។

គួរបញ្ជាក់ថា ក្នុងករណីទីពីរ ជនបំផ្ទុះគ្រាប់បែកអត្តឃាតម្នាក់បានបំផ្ទុះរថយន្តរបស់ខ្លួននៅច្រកចូលសាលាយោធាមួយនៅភាគពាយព្យ កាលពីយប់ថ្ងៃច័ន្ទ ហើយក្រុមសកម្ធប្រយុទ្ធមួយចំនួនទៀតបានសម្រុកចូលទៅខាងក្នុង។ នៅរសៀលថ្ងៃអង្គារ ប្រព័ន្ធផ្សព្វផ្សាយបានរាយការណ៍ថា ក្រុមសកម្មប្រយុទ្ធចំនួនបីនាក់នៅតែអាចលាក់ខ្លួននៅខាងក្នុងបរិវេណសាលា ដែលមានសិស្សានុសិស្ស និងបុគ្គលិកជាង ៥០០ នាក់នៅខាងក្នុង៕