(NIAGARA, កាណាដា)៖ ប្រធានគោលនយោបាយការបរទេសសហភាពអឺរ៉ុប (EU) លោកស្រី Kaja Kallas បានប្រាប់ Reuters កាលពីថ្ងៃពុធ ទី១២ ខែវិច្ឆិកាថា រឿងអាស្រូវពុករលួយទាក់ទងនឹងគម្រោងថាមពលនៅអ៊ុយក្រែន «ជារឿងមិនគួរឱ្យកើតឡើងឡើយ» ហើយទីក្រុងកៀវត្រូវយកចិត្តទុកដាក់ឱ្យបានខ្លាំង។

នៅក្រៅកិច្ចប្រជុំនៃបណ្តារដ្ឋមន្ត្រីការបរទេស G7 លោកស្រី Kallas បានគូសបញ្ជាក់យ៉ាងដូច្នេះថា «ពួកគេ (អ៊ុយក្រែន) កំពុងធ្វើសកម្មភាពយ៉ាងសស្រាក់សស្រាំ។ មិនឱ្យមានគួរមានអំពើពុករលួយទេ ជាពិសេសកាលៈទេសៈនេះ។ ខ្ញុំចង់និយាយថា វាជាលុយញើសឈាមប្រជាជន ដែលត្រូវយកទៅជួយនៅជួរមុខ»។ លោកស្រីបន្ថែមថា «ខ្ញុំ​គិត​ថា​អ្វី​ដែល​សំខាន់​ គឺត្រូវ​ដោះស្រាយឱ្យបាន​លឿនបំផុត»។

គួរបញ្ជាក់ថា ប្រធានាធិបតី លោក វ៉ូឡូឌីមៀ ហ្សេលេនស្គី កាលពីថ្ងៃពុធ បានស្នើដកតំណែងរដ្ឋមន្ត្រីពីររូបនៃគណៈរដ្ឋមន្ត្រី ចំពេលមានការស៉ើបអង្កេតលើករណីស៉ីដាច់លុយគម្រោងថាមពលចំនួន ១០០លានដុល្លារ ដែលបានបញ្ឆេះកំហឹងសាធារណៈជាថ្មី ចំពោះរដ្ឋាភិបាលអ៊ុយក្រែន៕