(ម៉ានីល)៖ នាថ្ងៃព្រហស្បតិ៍នេះ ប្រធានាធិបតីហ្វីលីពីន លោក Ferdinand Marcos Jr បាននិយាយថា ជនទាំងឡាយដែលនៅ​ពីក្រោយការប្រព្រឹត្តអំពើពុករលួយ ក្នុងគម្រោងហេដ្ឋារចនាសម្ព័ន្ធគ្រប់គ្រងទឹកជំនន់ នឹងត្រូវចាប់ខ្លួនមុនដំំណាច់ឆ្នាំនេះ បន្ទាប់ពីហ្វីលីពីន ទើបទទួលរងគ្រោះសាជាថ្មី ដោយសារព្យុះទីហ្វុងធំៗចំនួន២ទៀតបន្តបន្ទាប់គ្នា ដែលបានធ្វើឱ្យប្រទេសអាស៊ានមួយនេះ រងការជន់លិចយ៉ាងខ្លាំងក្លា។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ម្ចាស់ក្រុមហ៊ុនសំណង់ មន្រ្តីរដ្ឋាភិបាល និងសមាជិកសភាសរុបជាច្រើនរូប ដែលរួមមានទាំងបងប្អូនជីដូនមួយ របស់លោក Macros ផ្ទាល់ ត្រូវបានចោទប្រកាន់ថា លួចកិបកេងលុយពីមូលនិធិសម្រាប់គម្រោងកសាងហេដ្ឋារចនាសម្ព័ន្ធ ដើម្បីការពារគ្រោះទឹកជំនន់។ ក្រសួងហិរញ្ញវត្ថុហ្វីលីពីន បានវាយតម្លៃថា សេដ្ឋកិច្ចរបស់ប្រទេស បានរងការខាតបង់ខ្ទង់២ពាន់លានដុល្លារ ចាប់ពីឆ្នាំ២០២៣ ដល់ឆ្នាំ២០២៥ ដោយសារតែអំពើពុករលួយ ក្នុងគម្រោងទាំងនេះ។

ថ្លែងប្រាប់ក្រុមអ្នកសារព័ត៌មាន លោកប្រធានាធិបតីហ្វីលីពីន បាននិយាយថា ការកសាងសំណុំរឿងព្រហ្មទណ្ឌប្រឆាំងមនុស្សភាគច្រើន ដែលមានការជាប់ព័ន្ធក្នុងរឿងអាស្រូវពុករលួយនេះ គឺជិតចប់រួចរាល់ហើយ ហើយពួកគេទាំងនោះ នឹងមានឱកាសនៅប្រារព្ធថ្ងៃបុណ្យគ្រិស្មាស់ទេ ដែលលោកចង់សំដៅលើថ្ងៃទី២៥ ខែធ្នូ។

អំឡុងការថ្លែងសារទៅកាន់ប្រជាជាតិ កាលពីខែកក្កដា លោក Marcos បានលើកបញ្ហាខាងលើធ្វើជាប្រធានបទចម្បងបំផុត ខណៈសាធារណជនហ្វីលីពីន បានកើនឡើងកំហឹងជាខ្លាំង ជុំវិញបញ្ហានេះ។ នៅពេលត្រូវបានសាកសួរ ថាតើបងប្អូនជីដូនមួយរបស់លោក គឺលោក Martin Romualdez ដែលមានតួនាទីជាប្រធានរដ្ឋសភាហ្វីលីពីន នឹងត្រូវប្រឈមការចោទប្រកាន់ផ្លូវការដែរឬអត់ លោក ​Marcos បានឆ្លើយតបថា មិនទាន់នោះទេ ព្រោះភស្តុតាងមិនគ្រប់គ្រាន់ ប៉ុន្តែលោកបានបន្ថែមថា នឹងពុំមាននរណាម្នាក់ ត្រូវបានលើកលែងពីការស៉ើបអង្កេតឡើយ។

គួរបញ្ជាក់ថា ហ្វីលីពីន ទើបតែកំពុងស្តារប្រទេសឡើងវិញ ពីការវាយប្រហារដោយព្យុះទីហ្វុង Fung-wong ដែលបានបោកបក់​មកដល់កាលពីថ្ងៃអាទិត្យចុងសប្តាហ៍មុន ហើយបង្កការជន់លិចពាសពេញ និងសម្លាប់មនុស្សយ៉ាងហោច២៧នាក់។ ការមកដល់របស់វា គឺមិនយូរប៉ុន្មានឡើយ បន្ទាប់ពីព្យុះទីហ្វុងធំមួយទៀតឈ្មោះ Kalmaegi បានវាយប្រហារភាគកណ្តាលហ្វីលីពីន សម្លាប់មនុស្សរហូតដល់យ៉ាងហោច២៣២នាក់៕