(តូក្យូ)៖ ទីភ្នាក់ងារសារព័ត៌មានជប៉ុន Kyodo នៅថ្ងៃសៅរ៍ ទី១៥ ខែវិច្ឆិកា បានរាយការណ៍ថាជប៉ុនបានស្នើឱ្យចិនចាត់វិធានការសមស្រប បន្ទាប់ពីទីក្រុងប៉េកាំងបានព្រមានពលរដ្ឋឱ្យចៀសវាងការធ្វើដំណើរទៅកាន់ ប្រទេសជប៉ុន ក្នុងបរិបទនៃជម្លោះការទូតរវាងប្រទេសទាំង២ ជុំវិញការអត្ថាធិប្បាយរបស់នាយករដ្ឋមន្ត្រីជប៉ុនពាក់ព័ន្ធនឹងកោះតៃវ៉ាន់។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន Reuters។

តាម Kyodo ប្រធានលេខាធិការគណៈរដ្ឋមន្រ្តីជប៉ុន លោក Minoru Kihara បានឱ្យដឹងថាជប៉ុនបានបញ្ជូនសារទៅកាន់ចិន និងបានស្នើឱ្យទីក្រុងប៉េកាំងចាត់វិធានការសកម្មភាពសមស្រប។ ប៉ុន្តែ Kyodo មិនបាន ដកស្រង់សម្ដីរបស់លោក Kihara ឬលម្អិតពីការស្នើសុំរបស់ភាគីជប៉ុននោះទេ ដោយគ្រាន់តែបន្ថែមថាជប៉ុន និងចិនមានការខ្វែងគំនិតគ្នាលើបញ្ហាដែលកំពុងឡើង តែវាពិតជាសំខាន់ក្នុងការបន្តការរក្សាទំនាក់ទំនង។

គួរបញ្ជាក់ថា ចិនកាលពីថ្ងៃសុក្រសប្ដាហ៍នេះ បានចេញសេចក្ដីណែនាំឱ្យពលរដ្ឋរបស់ខ្លួនចៀសវាងការធ្វើដំណើរទៅកាន់ប្រទេសជប៉ុន ខណៈជម្លោះការទូតរវាងប្រទេសទាំង២កាន់តែឡើងកម្ដៅពាក់ព័ន្ធនឹង ការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី Sanae Takaichi អំពីការព្យាករពីការវាយប្រហារណាមួយរបស់ចិនលើតៃវ៉ាន់។

ការអត្ថាធិប្បាយរបស់លោកស្រី Takaichi កាលពីថ្ងៃទី៧ ខែវិច្ឆិកា ត្រូវបានបកស្រាយយ៉ាងទូលំទូលាយថាការវាយប្រហារណាមួយរបស់ចិនលើកោះតៃវ៉ាន់ដែលស្ថិតនៅចម្ងាយតែជាង ១០០គីឡូម៉ែត្រ ពីទឹកដីជប៉ុនអាចនឹងតម្រូវឱ្យមានការធ្វើអន្តរាគមន៍យោធាពីទីក្រុងតូក្យូ៕