(វ៉ាស៉ីនតោន)៖ នាថ្ងៃអាទិត្យ ទី១៦ ខែវិច្ឆិកា យោធាសហរដ្ឋអាមេរិក បានប្រកាសថា នាវាផ្ទុកយន្តហោះចម្បាំងអាមេរិក នាពេលនេះ កំពុងស្ថិតនៅសមុទ្រ Caribbean ដើម្បីគាំទ្រយុទ្ធនាការបង្រ្កាបសកម្មភាពរត់ពន្ធគ្រឿងញៀន ខណៈមន្ទីរបញ្ចកោណ បានប្រកាសអំពី​ការវាយប្រហារលើ ទូកសង្ស័យដឹកគ្រឿងញៀន១គ្រឿងទៀត នៅភាគខាងកើតមហាសមុទ្រប៉ាស៉ីហ្វិក សម្លាប់ជនសង្ស័យ៣នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីបញ្ជាការអាមេរិកភូមិភាគខាងត្បូង ហៅកាត់ SOUTHCOM ដែលទទួលបន្ទុកលើការធ្វើប្រតិបត្តិការរបស់យោធាអាមេរិក នៅក្នុង​តំបន់អាមេរិកឡាទីន និងតំបន់ Caribbean កាលពីប៉ុន្មានថ្ងៃមុន បាននិយាយថា ក្រុមនាវាផ្ទុកយន្តហោះចម្បាំង USS Gerald R. Ford បានធ្វើដំណើរចូលដល់ដែននៃការទទួលខុសត្រូវរបស់ខ្លួន។

រីឯនាថ្ងៃអាទិត្យ SOUTHCOM បាននិយាយថា ក្រុមនាវា Gerald Ford បានធ្វើដំណើរចូលដល់សមុទ្រ Caribbean ដើម្បីគាំទ្របទបញ្ជារបស់លោក ត្រាំ ក្នុងគោលដៅកម្ទេចបណ្តាញឧក្រិដ្ឋកម្មឆ្លងដែន និងទប់ទល់អំពើភេរវកម្មគ្រឿងញៀន ដើម្បីការពារសន្តិសុខរបស់សហរដ្ឋអាមេរិក។

តាមរយៈនេះ ក្រុមនាវា Gerald Ford បានចូលរួមជាមួយនាវាចម្បាំងមួយចំនួនទៀត ដែលស្ថិតនៅសមុទ្រ Caribbean ស្រាប់ ក្រោម​ប្រតិបត្តិការឈ្មោះ Operation Southern Spear។ ក្រោមក្របខណ្ឌនៃប្រតិបត្តិការនោះ មន្ទីរបញ្ចកោណបានប្រកាសថា ការវាយប្រហារថ្មីមួយទៀត ត្រូវបានធ្វើឡើង កាលពីថ្ងៃសៅរ៍ នៅភាគខាងកើតមហាសមុទ្រប៉ាស៉ីហ្វិក ផ្តាច់ជីវិតជនសង្ស័យរត់ពន្ធគ្រឿងញៀន ៣នាក់។

ចាប់តាំងពីយុទ្ធនាការយោធាបង្រ្កាបគ្រឿងញៀន បានចាប់ផ្តើមកាលពីខែកញ្ញាមក កងកម្លាំងរបស់សហរដ្ឋអាមេរិក បានសម្លាប់មនុស្ស​យ៉ាងហោច៨៣នាក់ ដែលរងការចោទប្រកាន់ថា លួចដឹកជញ្ជូនគ្រឿងញៀន នៅក្នុងដែនទឹកអន្តរជាតិ។ មកទល់នឹងពេលនេះ អាមេរិក មិនបានបញ្ចេញភស្តុតាងលម្អិតណាមួយ ដើម្បីគាំទ្រការចោទប្រកាន់របស់ខ្លួននៅឡើយទេ ថាមនុស្សទាំងឡាយ ដែលត្រូវបានកំណត់គោលដៅ ទាំងនៅ Caribbean និងភាគខាងកើតប៉ាស៉ីហ្វិក ក្នុងការវាយប្រហារសរុបច្រើនជាង២០លើក គឺពិតជាឧក្រិដ្ឋជនរត់ពន្ធគ្រឿងញៀន ប្រាកដមែន។ ក្រុមអ្នកជំនាញ យល់ឃើញថា ការវាយប្រហារទាំងនេះ គឺស្មើទៅនឹងការសម្លាប់មនុស្សក្រៅប្រព័ន្ធយុត្តិធម៌ ទោះបីគោលដៅទាំងនោះ គឺជាអ្នករត់ពន្ធគ្រឿងញៀនមែនក៏ដោយ។

គួរបញ្ជាក់ថា ប្រធានាធិបតី លោក ដូណាល់ ត្រាំ បានបញ្ជាឱ្យបង្កើនវត្តមានយោធាអាមេរិក ក្នុងទ្រង់ទ្រាយធំ នៅសមុទ្រ Caribbean ក្រោមរូបភាពយុទ្ធនាការបង្រ្កាបគ្រឿងញៀន ប៉ុន្តែមានការសង្ស័យថា ទីក្រុងវ៉ាស៉ីនតោនតាមពិតអាចកំពុងមានផែនការ ធ្វើអន្តរាគមន៍យោធាប្រឆាំងរបបដឹកនាំរបស់ប្រធានាធិបតីវ៉េណេស៊ុយអេឡា លោក Nicolas Maduro។ យ៉ាងណាមិញ កាលពីថ្ងៃអាទិត្យ លោក ត្រាំ បានបង្ហើបថា រដ្ឋាភិបាលរបស់លោក ប្រហែលអាចបើកចំហចំពោះការពិភាក្សាគ្នាជាមួយ លោក Maduro៕