(ដាក្កា)៖ ប៉ូលិសនិយាយថា គ្រាប់បែកជាច្រើនគ្រាប់បានផ្ទុះឡើង ក្នុងរដ្ឋធានីដាក្កា ប្រទេសបង់ក្លាដែស នៅថ្ងៃអាទិត្យចុងសប្តាហ៍កន្លងទៅ បង្កជាភាពតានតឹងកាន់តែខ្លាំង មុនការប្រកាសសាលក្រមនាថ្ងៃចន្ទនេះ ជុំវិញសំណុំរឿងប្រឆាំងអតីតនាយករដ្ឋមន្ត្រី លោកស្រី Sheikh Hasina ដែលត្រូវទម្លាក់ពីអំណាច ដោយបាតុកម្មហិង្សារបស់ក្រុមនិស្សិតកាលពីឆ្នាំមុន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៧ ខែវិច្ឆិកា ឆ្នាំ ២០២៥។

គ្មានសេចក្តីរាយកាណ៍អំពីអ្នករបួស ឬស្លាប់ទេ ប៉ុន្តែការបំផ្ទុះថែមទៀត ជំរុញឱ្យរដ្ឋធានីបង់ក្លាដែសមួយនេះកាន់តែវឹកវរ បន្ទាប់ពីមានចលាចលនយោបាយអស់ច្រើនថ្ងៃមកហើយ។ តាមប្រព័ន្ធផ្សព្វផ្សាយក្នុងស្រុក ស្នងការ​ប៉ូលិស​ក្រុង​ដាក្កា​បាន​ណែនាំ​ដល់មន្ត្រីឱ្យ​​បាញ់​​ជន​ណា​ដែល​ជាប់​ពាក់ព័ន្ធ​នឹង​ការ​ដុត ឬ​ប៉ុនប៉ង​បង្ក​ឱ្យ​មាន​មនុស្ស​ស្លាប់​ដោយ​ការ​គប់​គ្រាប់​បែក​។

សន្តិសុខត្រូវបានរឹតបន្តឹងនៅទូទាំងរដ្ឋធានីដាក្កា ក្នុងតំបន់ Gopalganj ដែលមានផ្ទះកេរដំណែលដូនតារបស់លោកស្រី Hasina និងជាទីតាំងដ៏រឹងមាំនៃគណបក្សរបស់លោកស្រី រួមទាំងនៅក្នុងសង្កាត់ចំនួនពីរដែលនៅជិតខាងគ្នា ដោយឆ្មាំការពារព្រំដែនបង់ក្លាត្រូវបានដាក់ពង្រាយ ដើម្បីជួយដល់អាជ្ញាធរក្នុងតំបន់។ ប៉ូលិស និងក្រុមទ័ពចម្រុះត្រូវបានដាក់ពង្រាយ នៅជុំវិញអគាររដ្ឋាភិបាលនានា និងផ្លូវប្រសព្វសំខាន់ៗ ធ្វើឱ្យផ្នែកខ្លះនៃរដ្ឋធានីដាក្កា មានសភាពស្ងប់ស្ងាត់ខុសពីធម្មតា។

គួរបញ្ជាក់ថា ប៉ុន្មានថ្ងៃមុនដល់ពេលប្រកាសសាលក្រមប្រឆាំង លោកស្រី Hasina អាជ្ញាធរបានកត់ត្រាការផ្ទុះគ្រាប់បែកជាង ៣០គ្រាប់ ហើយបានរាយការណ៍ថា រថយន្តក្រុងរាប់សិបគ្រឿងត្រូវបានដុតនៅក្នុងទីក្រុងដាក្កា និងស្រុកមួយចំនួនទៀត។ សកម្មជនគណបក្ស Awami រាប់សិបនាក់ក៏ត្រូវបានចាប់ខ្លួនផងដែរក្នុងប៉ុន្មានថ្ងៃថ្មីនេះ ជុំវិញការចោទប្រកាន់ថាជាប់ពាក់ព័ន្ធក្នុងការបំផ្ទុះ និងធ្វើសកម្មភាពបំផ្លិចបំផ្លាញ៕