(ហាណូយ)៖ តាមប្រព័ន្ធផ្សពផ្សាយរដ្ឋ នាថ្ងៃចន្ទ ទី១៧ ខែវិច្ឆិកា យ៉ាងហោចណាស់មនុស្សចំនួន ៦នាក់បានបាត់បង់ជីវិត នៅភាគកណ្តាលប្រទេសវៀតណាម ពេលរថយន្តក្រុងមួយគ្រឿងរងគ្រោះដោយបំណាក់ដី កាលពីយប់ថ្ងៃអាទិត្យ ខណៈដែលមានភ្លៀងធ្លាក់ខ្លាំងក្នុងតំបន់នោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

រថយន្តក្រុងនេះផ្ទុកអ្នកដំណើរ ៣២នាក់ បានចាកចេញពីទីក្រុង Da Lat ឆ្ពោះទៅកាន់ទីក្រុង Nha Trang ពេលឧប្បត្តិហេតុនោះកើតឡើង។ កាសែត VnExpress រាយការណ៍ថា បំណាក់ដីលើផ្លូវ Khanh Le Pass បង្កឡើងដោយសារតែភ្លៀងធ្លាក់ខ្លាំង ហើយក៏បានបណ្តាលឱ្យអ្នកដំណើរ ១៩នាក់រងរបួស។ អ្នកដំណើរ ២នាក់ជាប់ក្នុងរថយន្ត ដែលផ្នែកខ្លះកប់ក្នុងភក់ និងថ្ម។ អាជ្ញាធរ​កំពុង​ព្យាយាម​ជួយ​សង្គ្រោះ​ពួកគេ។

គួរបញ្ជាក់ថា នៅទីក្រុង Danang កាលពីថ្ងៃសុក្រសប្តាហ៍មុន មនុស្សចំនួន ៣នាក់ក៏បានបាត់ខ្លួនផងដែរ ដោយសារតែគ្រោះបំណាក់ដី៕