(ហ្សាការតា)៖ អាជ្ញាធរឥណ្ឌូណេស៊ីបានប្រកាសនៅថ្ងៃចន្ទនេះថា ការបាក់ដីដែលបង្កដោយភ្លៀងធ្លាក់នៅតំបន់ចំនួនពីរក្នុងខេត្តជ្វាកណ្ដាល (Central Java) កាលពីសប្តាហ៍មុន បានបណ្តាលឱ្យមនុស្សស្លាប់យ៉ាងហោចណាស់ ១៨នាក់ ខណៈប្រតិបត្តិការស្វែងរកអ្នកបាត់ខ្លួនកំពុងបន្តធ្វើឡើង។ នេះបើតាមការចេញផ្សាយ ដោយទីភ្នាក់ងារសារព័ត៌មានអន្តរជាតិ។

ទីភ្នាក់ងារកាត់បន្ថយគ្រោះមហន្តរាយបានឱ្យដឹងថា ការបាក់ដីនៅក្នុងទីក្រុង Cilacap កាលពីសប្តាហ៍មុន បានកប់ផ្ទះប្រជាពលរដ្ឋចំនួន ១២ខ្នងនៅក្នុងភូមិ Cibeunying។ កិច្ចខិតខំប្រឹងប្រែងស្វែងរក និងជួយសង្គ្រោះមានការលំបាក ដោយសារប្រជាជនត្រូវបានកប់នៅក្រោមដីជម្រៅពី ៣ ទៅ ៨ម៉ែត្រ។ លោក M Abdullah ប្រធានផ្នែកមូលដ្ឋាននៃទីភ្នាក់ងារស្វែងរក និងជួយសង្គ្រោះបានបញ្ជាក់ថា ការបាក់ដីនៅ Cilacap បានសម្លាប់មនុស្សយ៉ាងហោចណាស់ ១៦នាក់ និង ៧នាក់ទៀតកំពុងបាត់ខ្លួន។

ដោយឡែក គ្រោះបាក់ដីមួយទៀតដែលបានកើតឡើងកាលពីថ្ងៃសៅរ៍ នៅក្នុងតំបន់ Banjarnegara បានបណ្តាលឱ្យមនុស្ស ២នាក់ស្លាប់ និង ២៧នាក់ផ្សេងទៀតកំពុងបាត់ខ្លួន។ ទីភ្នាក់ងារកាត់បន្ថយគ្រោះមហន្តរាយបានបន្ថែមថា ផ្ទះប្រជាពលរដ្ឋប្រមាណ ៣០ខ្នង រួមទាំងដីកសិកម្មផងដែរ បានរងការខូចខាត។

គួរបញ្ជាក់ថា យោងតាមទីភ្នាក់ងារឧតុនិយម រដូវវស្សារបស់ប្រទេសក្នុងតំបន់អាស៊ីអាគ្នេយ៍មួយនេះ បានចាប់ផ្តើមតាំងពីខែកញ្ញា ហើយទំនងជានឹងបន្តរហូតដល់ខែមេសា ដែលនាំមកនូវហានិភ័យខ្ពស់នៃភ្លៀងធ្លាក់ខ្លាំង និងទឹកជំនន់៕