(វ៉ាស៉ីនតោន)៖ កាសែតអាមេរិក Politico នាថ្ងៃពុធ ទី១៩ ខែវិច្ឆិកា បានរាយការណ៍ថា មន្រ្តីយោធាជាន់ខ្ពស់អាមេរិក២រូប បានធ្វើដំំណើរទៅដល់ទីក្រុងកៀវ ក្នុងទស្សនកិច្ចកម្រមួយមិនប្រកាសឱ្យដឹងជាមុន ដើម្បី​ជួបពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក្នុងគោលដៅព្យាយាមស្តារឡើងវិញ នូវកិច្ចពិភាក្សាសន្តិភាពជាមួយរុស្ស៉ី។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters។

Politico បាននិយាយថា រដ្ឋលេខាធិការកងទ័ពជើងគោកអាមេរិក លោក Dan Dirscoll និងអគ្គសេនាធិការកងទ័ពជើងគោក នាយកឧត្តមសេនីយ៍ Randy George នឹងត្រូវជួបជាមួយលោក ហ្សេលេនស្គី ព្រមទាំងមេបញ្ជាការជាន់ខ្ពស់ និងសមាជិកសភា​របស់អ៊ុយក្រែន។ ទន្ទឹមគ្នា យោងតាមសេចក្តីរាយការណ៍ដាច់ដោយឡែករបស់កាសែតអាមេរិក Wall Street Journal លោក Driscoll ក៏ត្រូវបានរំពឹងថា នឹងជួបជាមួយក្រុមមន្រ្តីរបស់រុស្ស៉ី នៅកាលបរិច្ឆេទក្រោយមួយផងដែរ។ កាលពីថ្ងៃអង្គារ កាសែតអាមេរិកមួយទៀត Axios បានរាយការណ៍ថា រដ្ឋបាលលោក ត្រាំ បាននិងកំពុងសំងំបង្កើតផែនការថ្មីមួយ ដើម្បីព្យាយាម​បញ្ចប់សង្រ្គាមនៅអ៊ុយក្រែន ក្រោមការប្រឹក្សាយោបល់ជាមួយរុស្ស៉ី។

គួរបញ្ជាក់ថា ចាប់តាំងពីត្រឡប់មកកាន់អំណាចសាជាថ្មី កាលពីដើមឆ្នាំនេះមក ការធ្វើទស្សនកិច្ចទៅកាន់ទីក្រុងកៀវ ដោយមន្រ្តីជាន់ខ្ពស់ពីរដ្ឋបាលរបស់លោក គឺមិនសូវត្រូវបានធ្វើឡើងទេ ដោយការទាក់ទងគ្នាភាគច្រើន បានប្រព្រឹត្តទៅនៅប្រទេសទី៣ ឬតាមរយៈវីដេអូ ដូច្នេះហើយការបំពេញទស្សនកិច្ចខាងលើរបស់លោក Driscoll និងលោក George គឺខុសពីធម្មតាខ្លាំង។ បើតាម Wall Street Journal សេតវិមានបានងាកទៅពឹងផ្អែកលើមន្រ្តីការពារជាតិ និងមេបញ្ជាការកងទ័ពជាន់ខ្ពស់បែបនេះ មួយផ្នែកគឺដោយសារសង្ឃឹមថា ទីក្រុងមូស្គូនឹងអាចឆ្លើយតបប្រសើរជាងមុន បន្ទាប់ពីកិច្ចប្រឹងប្រែងការទូតកន្លងមក មិនទទួលបាន​លទ្ធផលជាដុំកំភួនអ្វី ក្នុងកិច្ចប្រឹងប្រែងបញ្ចប់សង្រ្គាមអ៊ុយក្រែន៕