(ដាកា)៖ រដ្ឋាភិបាលបង់ក្លាដែស បានប្រកាសនៅថ្ងៃសុក្រនេះថា មនុស្សយ៉ាងហោចណាស់ ៥នាក់ រួមទាំងកុមារម្នាក់បានស្លាប់ និងប្រហែល ១០០នាក់ផ្សេងទៀតរងរបួស បន្ទាប់ពីគ្រោះរញ្ជួយដីកម្រិត ៥.៧ រ៉ិចទ័រ បានវាយប្រហារចំកណ្តាលប្រទេស ដែលបណ្តាលឱ្យអគារជាច្រើនរងការខូចខាត ជាពិសេសនៅរដ្ឋធានីដាកា (Dhaka) ដ៏កកកុញ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក មូហាម៉ាត់ យូនុស (Muhammad Yunus) ប្រមុខរដ្ឋាភិបាលបណ្តោះអាសន្ន បានបញ្ជាក់ថា ក្នុងចំណោមអ្នករងរបួស រួមមាននិស្សិតមកពីសាកលវិទ្យាល័យដាកា កម្មកររោងចក្រនៅទីក្រុង Gazipur និងប្រជាពលរដ្ឋនៅតំបន់ Narsingdi ដែលជាចំណុចកណ្តាលនៃការរញ្ជួយដី ស្ថិតនៅចម្ងាយប្រហែល ៤០គីឡូម៉ែត្រពីភាគខាងកើតរដ្ឋធានីដាកា។ ប៉ូលិសបានរាយការណ៍ថា មនុស្ស ៣នាក់បានស្លាប់ នៅពេលដែលបង្កាន់ដៃនៃអគារកម្ពស់ ៦ជាន់បានបាក់ធ្លាក់មកលើអំឡុងពេលរញ្ជួយដី។

ប្រជាពលរដ្ឋនៅរដ្ឋធានីដាកា បានរត់ចេញពីផ្ទះសម្បែងរបស់ពួកគេយ៉ាងភ័យស្លន់ស្លោ ខណៈដែលអគារបានរង្គោះរង្គើ និងសំណង់មិនរឹងមាំខ្លះបានបាក់រលំ។ សាក្សីម្នាក់ឈ្មោះ Suman Rahman បាននិយាយថា «យើងមានអារម្មណ៍ថាមានការរង្គោះរង្គើយ៉ាងខ្លាំង ហើយអគារបានញ័រដូចដើមឈើ។ ជណ្តើរមានមនុស្សកកកុញ ខណៈដែលមនុស្សប្រញាប់ប្រញាល់ចុះមកក្រោម។ គ្រប់គ្នាមានការភ័យខ្លាច ហើយក្មេងៗបានស្រែកយំ»។

គួរបញ្ជាក់ថា ការរញ្ជួយនេះក៏ត្រូវបានគេដឹងនៅរដ្ឋភាគខាងកើតក្នុងប្រទេសឥណ្ឌាជាប់ព្រំដែនបង់ក្លាដែសផងដែរ ប៉ុន្តែមិនមានសេចក្តីរាយការណ៍អំពីការខូចខាតធ្ងន់ធ្ងរនៅទីនោះទេ។ រដ្ឋាភិបាលបង់ក្លាដែស បានបញ្ជាឱ្យបង្កើនប្រតិបត្តិការជួយសង្គ្រោះនៅតំបន់ដែលរងផលប៉ះពាល់ ខណៈអ្នករបួសធ្ងន់មួយចំនួនកំពុងសម្រាកព្យាបាលនៅមន្ទីរពេទ្យ៕