(ឌូបៃ)៖ អ្នកបើកបរយន្តហោះម្នាក់បានស្លាប់បាត់បង់ជីវិត បន្ទាប់ពីយន្តហោះចម្បាំងប្រភេទ Tejas របស់កងទ័ពអាកាសឥណ្ឌា បានធ្លាក់ក្នុងពេលកំពុងធ្វើការសម្តែងនៅឯពិព័រណ៍អាកាសចរណ៍ឌូបៃ (Dubai Airshow) នៅថ្ងៃសុក្រនេះ។ នេះបើតាមការបញ្ជាក់របស់មន្ត្រីផ្លូវការ។

យោងតាមទីភ្នាក់ងារសារព័ត៌មាន AP យន្តហោះចម្បាំងដែលផលិតដោយក្រុមហ៊ុន Hindustan Aeronautics Ltd នេះ បានជួបគ្រោះថ្នាក់នៅវេលាម៉ោងប្រហែល ១៤:១០នាទី (ម៉ោងក្នុងតំបន់)។ ការិយាល័យប្រព័ន្ធផ្សព្វផ្សាយឌូបៃ និងក្រសួងការពារជាតិអេមីរ៉ាតអារ៉ាប់រួម បានបញ្ជាក់ថា ក្រុមពន្លត់អគ្គិភ័យ និងសង្គ្រោះបន្ទាន់បានឆ្លើយតបយ៉ាងឆាប់រហ័សចំពោះហេតុការណ៍នេះ និងកំពុងគ្រប់គ្រងស្ថានការណ៍នៅកន្លែងកើតហេតុ។

កងទ័ពអាកាសឥណ្ឌា បានចេញសេចក្តីថ្លែងការណ៍ថា «យើងសោកស្តាយយ៉ាងក្រៀមក្រំចំពោះការបាត់បង់ជីវិត និងឈរយ៉ាងរឹងមាំជាមួយក្រុមគ្រួសារដែលកំពុងកាន់ទុក្ខក្នុងគ្រាដ៏សោកសៅនេះ។ គណៈកម្មការស៊ើបអង្កេតមួយកំពុងត្រូវបានបង្កើតឡើង ដើម្បីស្វែងរកមូលហេតុនៃគ្រោះថ្នាក់នេះ»។

គួរបញ្ជាក់ថា ហេតុការណ៍ដ៏រន្ធត់នេះបានកើតឡើងនៅថ្ងៃចុងក្រោយនៃព្រឹត្តិការណ៍ Dubai Airshow ឆ្នាំ២០២៥ ដែលបានចាប់ផ្តើមតាំងពីថ្ងៃចន្ទ។ ព្រឹត្តិការណ៍នេះ បានទាក់ទាញអ្នកចូលរួមជាង ១៤៨,០០០នាក់ និងក្រុមហ៊ុនដាក់តាំងបង្ហាញចំនួន ១,៥០០ក្រុមហ៊ុន៕