(PESHAWAR)៖ ជនបំផ្ទុះគ្រាប់បែកអត្តឃាត ៣នាក់ បានសម្រុកចូលទីស្នាក់ការកណ្តាល នៃកងកម្លាំងយោធាប៉ារ៉ា នៃប្រទេសប៉ាគីស្ថាន នាថ្ងៃចន្ទ ទី២៤ ខែវិច្ឆិកា ដោយបានសម្លាប់បុគ្គលិកយោធាចំនួន ៣នាក់ និងរបួសយ៉ាងហោចណាស់ ៥នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ប៉ូលិសនិយាយថា ជនសង្ស័យបានបើកការបាញ់ប្រហារ ពេលដែលចូលទៅក្នុងទីស្នាក់ការកណ្តាល នៃកងកម្លាំងសន្តិសុខខាងលើ មុនពេលបំផ្ទុះខ្លួនឯងនៅខាងក្នុងអគារ។ មេបញ្ជាការរង លោក Javed Iqbal បាន​ឱ្យ​ថា បុគ្គលិក​យោធា​ ៣នាក់​ត្រូវ​បាន​សម្លាប់។ ចំណែក អ្នករងរបួស ៥នាក់ រួមទាំងបុគ្គលិកយោធាពីរនាក់ ត្រូវនាមបញ្ជូនទៅកាន់មន្ទីរពេទ្យ។ មកដល់ពេលនេះ មិនទាន់មានក្រុមណាមួយ ចេញមុខអះអាងចំពោះ ការវាយប្រហារនេះទេ។

គួរបញ្ជាក់ថា ស្នាក់ការកណ្តាលនៃកងកម្លាំងយោធាប៉ារ៉ាប៉ាគីស្ថាន មានទីតាំងនៅក្នុងតំបន់ប្រជាជនរស់នៅច្រើនកុះករ នៃទីក្រុង Peshawar ខេត្ត Khyber Pakhtunkhwa។ កន្លងមក ប៉ាគីស្ថាន​បន្ទោសក្រុម​តាលីបង់​អាហ្វហ្គានីស្ថាន​ ជុំវិញការ​ផ្តល់​ជម្រក​ដល់​ពួក​សកម្មប្រយុទ្ធ ​ដែល​តែងបើក​ការ​វាយប្រហារ​ឆ្លង​ព្រំដែន។ ប៉ុន្តែទីក្រុងកាប៊ុល បានប្រចានចោល​ការ​ចោទប្រកាន់​នោះ៕