(ហុងកុង)៖ មេដឹកនាំទីក្រុងហុងកុង លោក John Lee បាននិយាយកាលពីថ្ងៃចន្ទ ទី២៤ ខែវិច្ឆិកាថា រដ្ឋបាលពិសេសហុងកុង គាំទ្រគោលនយោបាយការបរទេស ចំពោះប្រទេសជប៉ុន ហើយមជ្ឈមណ្ឌលហិរញ្ញវត្ថុរបស់ចិនមួយនេះ នឹងតាមដានស្ថានការណ៍យ៉ាងយកចិត្តទុកដាក់ ហើយចាត់វិធានការឆ្លើយតបឱ្យបានសមស្រប។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Lee គូសបញ្ជាក់ថា «ការ​លើក​ឡើង​ដ៏ខុសឆ្គងទាំង​នេះ ​ធ្វើ​ឱ្យ​បរិយាកាស​ផ្លាស់​ប្តូរទំនាក់ទំនង ​រវាង​ចិន និង​ជប៉ុន​ធ្លាក់​ចុះយ៉ាង​​ខ្លាំង។ វាធ្វើឱ្យយើងមានមន្ទិលសង្ស័យ ជុំវិញ​​ប្រសិទ្ធភាព​នៃ​ការ​ផ្លាស់ប្តូរក្នុងវិស័យជាច្រើន»។

នេះជាការអត្ថាធិប្បាយលើកដំបូងដោយមេដឹកនាំនៃទីក្រុងហុងកុង ដែលបង្ហាញជាសាធារណៈលើភាពតានតឹងចិន-ជប៉ុន ក្នុងរយៈពេលជាងពីរសប្តាហ៍។ តាមទីភ្នាក់ងារព័ត៌មានជប៉ុន Kyodo ហុងកុងបានផ្អាកធ្វើការជាមួយស្ថានកុងស៊ុលជប៉ុន។ លោក Lee មិនបានផ្តលចម្លើយច្បាស់ទាក់ទងការផ្អាកនេះទេ ប៉ុន្តែបាននិយាយថា ការសម្រេចចិត្តរបស់ទីក្រុងហុងកុង គឺផ្អែកលើសេចក្តីថ្លៃថ្នូររបស់ជាតិ និងផលប្រយោជន៍ប្រជាជន។

គួរបញ្ជាក់ថា ជប៉ុនជាទិសដៅទេសចរណ៍កំពូលមួយ សម្រាប់អ្នករស់នៅហុងកុង ដោយមានជើងហោះហើរប្រចាំថ្ងៃជិត ១៥០ ជាមួយទីក្រុងចំនួន ១៣របស់ជប៉ុន អំឡុងរដូវបុណ្យទានដូចជាចូលឆ្នាំចិនជាដើម។ ប្រជាជនហុងកុងប្រហែល ២.៦៨លាននាក់បានទៅលេងជប៉ុន កាលពីឆ្នាំមុន ដែលស្មើនឹង ៧.៣ភាគរយនៃភ្ញៀវទេសចរបរទេសសរុប៕