(កាប៊ុល)៖ អ្នកនាំពាក្យរដ្ឋាភិបាលតាលីបង់ នាថ្ងៃអង្គារនេះ បានអះអាងថា ប៉ាគីស្ថានបានបើកការវាយប្រហារតាមផ្លូវអាកាស លើប្រទេសអាហ្វហ្កានីស្ថាន បណ្តាលឱ្យមនុស្សយ៉ាងហោច១០នាក់ បាត់បង់ជីវិត បន្ទាប់ពីមានករណីវាយប្រហារអត្តឃាតលើ​មូលដ្ឋានកងកម្លាំងសន្តិសុខរបស់ប៉ាគីស្ថាន នៅទីក្រុង Peshawar។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី២៥ ខែវិច្ឆិកា ឆ្នាំ២០២៥។

លោក Zabihullah Mujahid អ្នកនាំពាក្យរដ្ឋាភិបាលតាលីបង់ បាននិយាយថា កងកម្លាំងប៉ាគីស្ថាន បានធ្វើការទម្លាក់គ្រាប់បែក​លើតំបន់ជនស៉ីវិលរស់នៅ ក្នុងខេត្ត Khost ជាហេតុនាំឱ្យកុមារ៩នាក់ និងស្រ្តីម្នាក់ស្លាប់។ ជាមួយគ្នានោះ ការវាយប្រហារផ្លូវអាកាស កំណត់គោលដៅលើតំបន់ព្រំដែន Kunar និង Paktika ក៏បានបង្កឱ្យជនស៉ីវិល៤នាក់ផ្សេងទៀត រងរបួសផងដែរ។

ការទម្លាក់គ្រាប់បែកនេះកើតមានឡើង បន្ទាប់ពីករណីវាយប្រហារបំផ្ទុះគ្រាប់បែកអត្តឃាតកាលពីថ្ងៃចន្ទ នៅទីស្នាក់ការកងកម្លាំងយោធាប៉ារ៉ារបស់ប៉ាគីស្ថាន ក្នុងទីក្រុង Peshawar ដែលសម្លាប់មន្រ្តីយោធា៣នាក់ និងបង្កឱ្យរបួស​១១នាក់។ ប្រព័ន្ធផ្សព្វផ្សាយរដ្ឋនិងប្រធានាធិបតីប៉ាគីស្ថាន ហាក់បានទម្លាក់កំហុសករណីវាយប្រហារនោះ លើក្រុមសកម្មប្រយុទ្ធ TTP ដែលត្រូវបានចោទប្រកាន់ថា ធ្វើប្រតិបត្តិការចេញពីទឹកដីរបស់អាហ្វហ្កានីស្ថាន។

គួរបញ្ជាក់ថា ទំនាក់ទំនងរវាងប៉ាគីស្ថាននិងអាហ្វហ្កានីស្ថាន បានធ្លាក់ចុះចាប់តាំងពីក្រុមតាលីបង់ បានត្រឡប់មកកាន់អំណាចវិញ កាលពីឆ្នាំ២០២១ ហើយបានដុនដាបកាន់តែខ្លាំង ក្រោយការប៉ះទង្គិចគ្នាយ៉ាងប្រល័យនៅតំបន់ព្រំដែន កាលពីខែតុលាកន្លងទៅ។ ការប្រយុទ្ធគ្នានោះ បានបញ្ចប់ទៅវិញ តាមរយៈបទឈប់បាញ់ ដែលជួយសម្រុះសម្រួលដោយកាតានិងតួកគីយ៉េ ប៉ុន្តែកិច្ចចរចាបន្ត​នៅទីក្រុងអ៉ីស្តង់ប៊ុល បានជាប់គាំងមិនអាចសម្រេចបាន នូវកិច្ចព្រមព្រៀងសន្តិភាពយូរអង្វែងមួយ៕