(ភ្នំពេញ)៖ ក្រោយមានរបាយការណ៍របស់ អង្គឃ្លាំមើលសិទ្ធិមនុស្សអន្តរជាតិ បានចោទប្រកាន់មកលើកម្ពុជា ថាគ្មានការងារគ្រប់គ្រាន់សម្រាប់ពលករខ្មែរដែលទើបវិលត្រឡប់ពីប្រទេសថៃនោះ អ្នកនាំពាក្យក្រសួងការងារ បានបញ្ជាក់ថា របាយការណ៍នេះគ្មានវិជ្ជាជីវៈ និងផ្ទុយពីតថភាពជាក់ស្តែងនៅកម្ពុជា ខណៈដែលពេលនេះមានឱកាសការងារជាង៨ម៉ឺនកន្លែងនៅមាន និង៤០ម៉ឺនកន្លែងបន្ថែមសម្រាប់ការវិនិយោគថ្មី។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា របាយការណ៍របស់អង្គឃ្លាំមើលសិទ្ធិមនុស្សអន្តរជាតិ គឺមិនស្របនឹងវិទ្យាសាស្ត្រ និងការរីកចម្រើនលូតលាត់របស់សង្គមកម្ពុជានោះទេ។ កម្ពុជាពេលនេះ មានការអភិវឌ្ឍច្រើន ទាំងហេដ្ឋារចនាសម្ព័ន្ធ ទាំងស្ថេរនយោបាយ និងជាទីតាំងភូមិសាស្ត្រមួយដ៏មានសក្ដានុពល ដែលអំណោយផលដល់ការវិនិយោគជាច្រើន។

ការលើកឡើងរបស់អង្គឃ្លាំមើលសិទ្ធិមនុស្សអន្តរជាតិ បានធ្វើឡើងតាមរយៈការសម្ភាសមនុស្ស៥៦នាក់ ដោយពុំស្គាល់អត្តសញ្ញាណ។ ការណ៍នេះ ក្រសួងការងារ សូមឱ្យអង្គឃ្លាំមើលសិទ្ធិមនុស្សអន្តរជាតិ ផ្ដល់អត្តសញ្ញាណដើម្បីធ្វើការសម្របសម្រួលផ្ដល់ការងារជូនទៅពួកគាត់។ នេះបើយោងតាមការគូសបញ្ជាក់បន្ថែមរបស់ លោក ស៊ុន មេសា អ្នកនាំពាក្យក្រសួងការងារ៕

សូមស្ដាប់ការបញ្ជាក់របស់ លោក ស៊ុន មេសា ដូចតទៅ៖