(ញូវដែលី)៖ អ្នកនាំពាក្យម្នាក់របស់ក្រសួងការបរទេសឥណ្ឌា បានឱ្យដឹងកាលពីថ្ងៃពុធ ទី២៦ ខែវិច្ឆិកាថាឥណ្ឌាកំពុងពិនិត្យលើសំណើពីបង់ក្លាដែស ដើម្បីធ្វើបត្យាប័នអតីតនាយករដ្ឋមន្ត្រីលោកស្រី Sheikh Hasina។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

តាមអ្នកនាំពាក្យក្រសួងការបរទេសឥណ្ឌា សំណើសុំធ្វើបត្យាប័នដែលត្រូវបានធ្វើឡើងដំបូងកាលពីខែធ្នូ ឆ្នាំ២០២៤ និងបានស្នើជាថ្មីក្នុងខែវិច្ឆិកានេះ បន្ទាប់ពីលោកស្រី Hasina ត្រូវបានផ្តន្ទាទោសប្រហារជីវិត ពីបទឧក្រិដ្ឋកម្មប្រឆាំងមនុស្សជាតិពាក់ព័ន្ធនឹងតួនាទីរបស់លោកស្រីក្នុងការបង្ក្រាបដ៏បង្ហូរឈាមលើក្រុមបាតុករជានិស្សិតកាលពីឆ្នាំមុន កំពុងស្ថិតនៅក្រោមការត្រួតពិនិត្យដោយឥណ្ឌា នៅក្រោមក្របខណ្ឌនៃ ដំណើរការផ្លូវច្បាប់ និងតុលាការក្នុងស្រុក។

លោកស្រី Sheikh Hasina មានអាយុ៧៨ឆ្នាំ បានរត់ភៀសខ្លួនចេញពីបង់ក្លាដែស ទៅកាន់ប្រទេសឥណ្ឌា ក្រោយត្រូវបានទម្លាក់ចេញពីតំណែងអំឡុងបាតុកម្មទូទាំងប្រទេសកាលពីខែសីហា ឆ្នាំ២០២៤។

គួរបញ្ជាក់ថា តុលាការបង់ក្លាដែសបានផ្តន្ទាទោសប្រហារជីវិតលោកស្រី Hasina ដោយកំបាំងមុខ កាលពីថ្ងៃទី១៧ ខែវិច្ឆិកា។ បន្ទាប់ពីប្រកាសសាលក្រមរបស់តុលាការ ក្រសួងការបរទេសបង់ក្លាដែស បានលើកឡើងក្នុងសេចក្ដីថ្លែងការណ៍មួយថាឥណ្ឌាមានកាតព្វកិច្ចទទួលខុសត្រូវនៅក្រោមសន្ធិសញ្ញាទ្វេភាគីស្ដីពីការធ្វើបត្យាប័នដែលត្រូវបានចុះហត្ថលេខា កាលពីឆ្នាំ២០១៣ ដើម្បីធ្វើបត្យាប័នលោកស្រី Hasina ហើយថាការបន្តអនុញ្ញាតឱ្យលោកស្រីបន្តរស់នៅជ្រកកោនក្នុងប្រទេសឥណ្ឌាគឺជាទង្វើអមិត្តធ្ងន់ធ្ងរ៕