(ប្រាស៉ីលីយ៉ា)៖ កាលពីថ្ងៃពុធ ទី២៦ ខែវិច្ឆិកា អាជ្ញាធរនៅប្រទេសប្រេស៉ីល បានផ្តល់ភ្លើងបៃតងចំពោះវ៉ាក់សាំងបង្ការជំងឺគ្រុនឈាម ដែលតម្រូវឱ្យចាក់ត្រឹមតែមួយដូស ដំបូងបំផុតរបស់ពិភពលោក ស្របពេលដែលករណីជំងឺបង្កដោយសត្វមូសនេះ មានការកើនឡើងនៅ​ជុំវិញពិភពលោក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីភ្នាក់ងារនិយតករសុខាភិបាលរបស់ប្រេស៉ីល ANVISA បានផ្តល់ការអនុញ្ញាតចំពោះការប្រើប្រាស់ជាផ្លូវការ នូវវ៉ាក់សាំងហៅថា Butantan-DV ដែលអភិវឌ្ឍដោយវិទ្យាស្ថាន Butantan នៃទីក្រុង Sao Paulo សម្រាប់អ្នកមានវ័យចាប់ពី១២ឆ្នាំ ដល់៥៩ឆ្នាំ។ អំឡុងការធ្វើតេស្តសាកល្បង អស់រយៈពេលប្រមាណ៨ឆ្នាំមកនេះ នៅទូទាំងប្រេស៉ីល វ៉ាក់សាំងនេះបានបង្ហាញថា មានប្រសិទ្ធភាព ៩១.៦ភាគរយ ប្រឆាំងករណីជំងឺគ្រុនឈាមសភាពធ្ងន់ធ្ងរ។

គួរបញ្ជាក់ថា យោងតាមអង្គការសុខភាពពិភពលោក WHO បច្ចុប្បន្ន វ៉ាក់សាំងបង្ការជំងឺគ្រុនឈាមតែមួយគត់ ដែលត្រូវបានប្រើប្រាស់ នៅជុំវិញពិភពលោក គឺហៅថា TAK-003 ដែលជាវ៉ាក់សាំងតម្រូវឱ្យចាក់២ដូស ក្នុងគម្លាតរយៈពេល ៣ខែពីគ្នា។ ករណីជំងឺគ្រុនឈាម បានកើនឡើងដល់កម្រិតខ្ពស់បំផុតនៅទូទាំងពិភពលោក កាលពីក្នុងឆ្នាំ២០២៤ ហើយក្រុមអ្នកស្រាវជ្រាវ បានបន្ទោសលើការប្រែប្រួលអាកាសធាតុនៃផែនដី៕