(ប្រាស៉ីលីយ៉ា)៖ កាលពីថ្ងៃពុធ ទី២៦ ខែវិច្ឆិកា ប្រធានាធិបតីនៃប្រទេសប្រេស៉ីល លោក Luiz Inacio Lula da Silva បាននិយាយថា ប្រេស៉ីលបានផ្តល់មេរៀនមួយ អំពីលទ្ធិប្រជាធិបតេយ្យ ដល់ពិភពលោក បន្ទាប់ពីអតីតប្រធានាធិបតី លោក Jair Bolsonaro ត្រូវបានផ្តន្ទាទោសដាក់ពន្ធនាគារ ពីបទប៉ុនប៉ងធ្វើរដ្ឋប្រហារបរាជ័យ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Bolsonaro វ័យ៧០ឆ្នាំ បានចាប់ផ្តើមអនុវត្តទោសជាប់ពន្ធនាគារ រយៈពេល២៧ឆ្នាំ កាលពីថ្ងៃអង្គារសប្តាហ៍នេះ បន្ទាប់ពី​ត្រូវបានកាត់ទោស ជុំវិញផែនការរារាំងមិនឱ្យលោក Lula ចូលកាន់អំណាច ក្រោយការបោះឆ្នោតកាលពីឆ្នាំ២០២២។ ប្រធានាធិបតីអាមេរិក លោក ដូណាល់ ត្រាំ ដែលជាសម្ព័ន្ធមិត្តរបស់លោក Bolsonaro បានចេញមុខរិះគន់សំណុំរឿងនេះ និងថែមទាំងបានដាក់ទណ្ឌកម្មក៏ដូចជាពន្ធគយធ្ងន់ៗលើប្រេស៉ីល ប៉ុន្តែមកទល់ឥឡូវ ពន្ធជាច្រើនត្រូវបានដកចេញវិញហើយ។

លោក Lula បានលើកឡើងយ៉ាងដូច្នេះថា «ម្សិលមិញ ប្រទេសនេះបានផ្តល់មេរៀនដល់ពិភពលោក អំពីលទ្ធិប្រជាធិបតេយ្យ។ ប្រព័ន្ធយុត្តិធម៌របស់ប្រេស៉ីល បានបង្ហាញភាពរឹងមាំរបស់ខ្លួន ហើយមិនកោតខ្លាចការគំរាមកំហែងពីខាងក្រៅនោះទេ។ ជាលើកដំបូងបំផុតក្នុងរយៈពេល៥០ឆ្នាំ នៃប្រវត្តិសាស្រ្តរបស់ប្រទេសមួយនេះ មានបុគ្គលដែលត្រូវបានដាក់ពន្ធនាគារ ដោយសារការប៉ុនប៉ងធ្វើរដ្ឋប្រហារ នៅក្នុងប្រទេសមួយ ដែលធ្លាប់មានការប៉ុនប៉ងរដ្ឋប្រហារប៉ុន្មានលើក និងធ្លាប់បានរស់នៅក្រោម​របបយោធាផ្តាច់ការ កាលពីចន្លោះឆ្នាំ១៩៦៤ និង១៩៨៥។ អតីតប្រធានាធិបតីម្នាក់ និងនាយឧត្តមសេនីយ៍ផ្កាយបួន៤នាក់ ត្រូវបានដាក់ពន្ធនាគារ ដែលវាបង្ហាញថា លទ្ធិប្រជាធិបតេយ្យគឺអនុវត្តលើបុគ្គលគ្រប់រូបទាំងអស់»។

គួរបញ្ជាក់ថា លោក Bolsonaro ត្រូវបានរកឃើញមានទោស កាលពីខែកញ្ញា ឆ្នាំនេះ ពីបទដឹកនាំអង្គការឧក្រិដ្ឋជនមួយ ដែលគប់គិតធ្វើយ៉ាងណាឱ្យលោកនៅរក្សាអំណាច។ ផែនការនោះ រួមមានគម្រោងធ្វើឃាត លោក Lula អតីតប្រធានាធិបតី លោក Geraldo Alckmin និងចៅក្រមតុលាការកំពូល លោក Alexandre de Moraes។ ក្រុមរដ្ឋអាជ្ញាប្រេស៉ីល បាននិយាយថា ផែនការនោះបានទទួលបរាជ័យ គឺដោយសារតែខ្វះការគាំទ្រពីក្រុមថ្នាក់ដឹកនាំកំពូលៗ ក្នុងជួរយោធាប៉ុណ្ណោះ៕