(ហ្សាការតា)៖ គ្រោះទឹកជំនន់ និងបំណាក់ដីបង្កឡើងដោយសារតែភ្លៀងធ្លាក់ខ្លាំង នៅខេត្ត Sumatra ភាគខាងជើងឥណ្ឌូណេស៉ី បាននាំឱ្យចំនួនអ្នកស្លាប់កើនដល់ ២៨នាក់ គិតត្រឹមថ្ងៃព្រហស្បតិ៍ ទី២៧ ខែវិច្ឆិកានេះ ខណៈក្រុមមន្រ្តីនិយាយថា ផ្លូវខូចខាតទាំងស្រុង និងការដាច់សេវាទំនាក់ទំនង បានរារាំងដល់កិច្ចប្រឹងប្រែងជួយសង្រ្គោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

លោក Abdul Muhari អ្នកនាំពាក្យទីភ្នាក់ងារកាត់បន្ថយគ្រោះមហន្តរាយ របស់ប្រទេសឥណ្ឌូណេស៉ី បាននិយាយថា មនុស្ស ១០នាក់នៅតែបាត់ខ្លួន។ មនុស្ស ៨ ០០០នាក់នៅទូទាំងខេត្ត Sumatra ភាគខាងជើង ត្រូវបានជម្លៀស ខណៈផ្លូវថ្នល់រាំងខ្ទប់ដោយកម្ទេចកម្ទីបាក់ដី ជាហេតុធ្វើឱ្យជំនួយ និងសម្ភាៈផ្សេងទៀតត្រូវចែកចាយតាមឧទ្ធម្ភាគចក្រ។ តាមមន្ត្រីម្នាក់នៃទីភ្នាក់ងារកាត់បន្ថយគ្រោះមហន្តរាយខេត្ត តំបន់ Sibolga និង Central Tapanuli ស្ថិតក្នុងចំណោមតំបន់ ដែលរងផលប៉ះពាល់ខ្លាំងបំផុត ដោយខ្សែបណ្តាញទំនាក់ទំនង និងថាមពលត្រូវបានកាត់ផ្តាច់។

គួរបញ្ជាក់ថា ព្យុះស៉ីក្លូនដ៏កម្រ បានបោកបក់ទូទាំងកោះ Sumatra រួមទាំងនៅជិតច្រកសមុទ្រ Malacca ហើយបង្កជាទឹកជំនន់ និងបំណាក់ដី ចំពេលដែលប្រទេសអាស៊ានដទៃ ក៏កំពុង​ប្រឈម​នឹងគ្រោះ​ទឹកជំនន់​ដ៏​សាហាវផងដែរ៕