(កូឡុំបូ)៖ ទឹកជំនន់ និងបំណាក់ដី ដោយសារតែភ្លៀងធ្លាក់ខ្លាំង បានឆក់យកជីវិតមនុស្សចំនួន ៣១នាក់ នៅទូទាំងប្រទេសស្រីលង្កា ក្នុងសប្តាហ៍នេះ និងបាត់ខ្លួនចំនួន ១៤នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២៧ ខែវិច្ឆិកា ឆ្នាំ ២០២៥។

មជ្ឈមណ្ឌលគ្រប់គ្រងគ្រោះមហន្តរាយ (DMC) បានឱ្យដឹងថា អ្នកស្លាប់ភាគច្រើននៅក្នុងស្រុក Badulla ដែលតំបន់ដាំដុះតែ ភាគកណ្តាល ជាទីដែលមនុស្ស ១៦នាក់ត្រូវកប់ជាប់ក្រោមដីទាំងរស់ ពេលដែលជម្រាលភ្នំបាក់លើផ្ទះរបស់ពួកគេទាំងយប់។ មានអ្នកស្លាប់ ៤នាក់ដោយហេតុការណ៍ស្រដៀងគ្នានេះ ក្នុងស្រុក Nuwara Eliya និងនៅកន្លែងផ្សេងទៀត។ ជិត ៤០០ខ្នងផ្ទះ ត្រូវបានបំផ្លាញដោយល្បាប់ភក់ ខណៈពលរដ្ឋជាង ១ ១០០គ្រួសារត្រូវទៅស្នាក់នៅជម្រកបណ្តោះអាសន្ន។ កម្ពស់ទឹកទន្លបានហក់ឡើង នៅទូទាំងប្រទេសស្រីលង្កា ហើយ DMC បានជំរុញឱ្យអ្នកស្រុកនៅតំបន់ទំនាប ផ្លាស់ទៅរកទីទួលខ្ពស់។

គួរបញ្ជាក់ថា ប្រទេសស្រីលង្កាបច្ចុប្បន្ន កំពុងជួបប្រទះនឹងរដូវមូសុងឦសាន ប៉ុន្តែទឹកភ្លៀងបានកើនឡើងខ្លាំង ដោយសារតែវិសម្ពាធទាប នៅភាគខាងកើតនៃប្រទេសដែនកោះមួយនេះ៕