(អាមេរិក)៖ ប៉ូលិសនៅសហដ្ឋអាមេរិក បានឱ្យដឹងថា កាលពីវេលាយប់ថ្ងៃសៅរ៍ មនុស្ស៤នាក់បានស្លាប់ និង១០នាក់ផ្សេងទៀត បានរងរបួសក្នុងករណីបាញ់ប្រហារមួយ នៅរដ្ឋ California។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី៣០ ខែវិច្ឆិកា ឆ្នាំ២០២៥។

ការិយាល័យប៉ូលិសតំបន់ San Joaquin County បានឱ្យដឹងថា មនុស្សសរុបចំនួន១៤នាក់ បានរងការបាញ់ប្រហារ ហើយ​ជនរងគ្រោះ៤នាក់ក្នុងចំណោមនោះ បានបាត់បង់ជីវិត។ នាពេលនេះ ការស៉ើបអង្កេតលម្អិតកំពុងតែប្រព្រឹត្តទៅ ខណៈព័ត៌មានជាក់លាក់ជុំវិញហេតុការណ៍នេះ គឺមិនទាន់ច្បាស់នោះទេ ដោយតម្រុយជាបឋមបានបង្ហាញថា វាអាចជាឧប្បត្តិហេតុ ដែលមានការកំណត់គោលដៅទុក។

គួរបញ្ជាក់ថា បើតាមការបង្ហោះសារលើ Facebook របស់អភិបាលរងទីក្រុង Stockton នៅភាគខាងជើងរដ្ឋ California ហេតុការណ៍ខាងលើ បានកើតឡើងអំឡុងពិធីខួបកំណើតកូនក្មេង។ យ៉ាងណាមិញ អាជ្ញាធរអាមេរិក មិនទាន់ផ្តល់ព័ត៌មាន អំពីជនដែលបង្កសកម្មភាពបាញ់ប្រហារនេះ នៅឡើយទេ៕