(គូឡាឡាំពួ)៖ ក្រសួងដឹកជញ្ជូននៃប្រទេសម៉ាឡេស៉ី នាថ្ងៃពុធនេះ បានប្រកាសថា កិច្ចប្រឹងប្រែងស្វែងរកយន្តហោះជើងហោះហើរ MH370 របស់អាកាសចរណ៍ម៉ាឡេស៉ី នឹងបន្តឡើងវិញ នៅថ្ងៃទី៣០ ខែធ្នូ ក្រោយការបាត់ខ្លួនយ៉ាងអាថ៌កំបាំងបំផុត អស់រយៈពេល​ជាង១ទសវត្សរ៍មកហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៣ ខែធ្នូ ឆ្នាំ២០២៥។

ជើងហោះហើរ MH370 ដែលជាយន្តហោះ Boeing 777 មានផ្ទុកអ្នកដំណើរចំនួន២២៧នាក់ និងក្រុមការងារយន្តហោះ១២នាក់ នៅពេល​ដែលវាបានបាត់ចេញពីប្រព័ន្ធរ៉ាដា នៅលើគន្លងផ្លូវ ពីទីក្រុងគូឡាឡាំពួ ឆ្ពោះទៅទីក្រុងប៉េកាំង កាលពីឆ្នាំ២០១៤។ តាំងពីពេលនោះ ធ្លាប់មានប្រតិបត្តិការរុករកជាច្រើន ត្រូវបានធ្វើឡើង ប៉ុន្តែសុទ្ធតែមិនទទួលបានលទ្ធផល។

ប្រតិបត្តិការរុករកចុងក្រោយគេ នៅភាគខាងត្បូងមហាសមុទ្រឥណ្ឌា ត្រូវបានផ្អាកកាលពីខែមេសា ក្រោយប្រព្រឹត្តទៅបានត្រឹមតែ​ប៉ុន្មានសប្តាហ៍ ដោយសារបញ្ហាលក្ខខណ្ឌអាកាសធាតុ។ តាមក្រសួងដឹកជញ្ជូនម៉ាឡេស៉ី ក្រុមហ៊ុនរុករក Ocean Infinity បានបញ្ជាក់ថា ខ្លួននឹងបើកប្រតិបត្តិការរុករកក្រោមបាតសមុទ្រ សម្រាប់រយៈពេល៥៥ថ្ងៃ ក៏ប៉ុន្តែមិនប្រព្រឹត្តទៅ​ជាប់គ្នាតែម្តងនោះទេ។

ក្រុមអ្នកស៉ើបអង្កេតម៉ាឡេស៉ី មិនបានច្រានចោលលទ្ធភាព ដែលថាយន្តហោះ ត្រូវបានបង្វែរគោលដៅធ្វើដំណើរ ដោយចេតនាឡើយ ដ្បិតបំណែកមួយចំនួន ដែលខ្លះត្រូវបានផ្ទៀតផ្ទាត់ និងខ្លះត្រូវបានជឿថា ជារបស់យន្តហោះនោះ ត្រូវបានប្រទះឃើញនៅតាមបណ្តោយឆ្នេរនៃទ្វីបអាហ្រ្វិក និងនៅតាមកោះក្នុងមហាសមុទ្រឥណ្ឌា។

គួរបញ្ជាក់ថា នៅលើយន្តហោះ MH370 រួមមានអ្នកដំណើរជនជាតិចិនជាង១៥០នាក់ ម៉ាឡេស៉ី៥០នាក់ និងពលរដ្ឋមកពីបណ្តាប្រទេសដទៃទៀត ដូចជាបារាំង អូស្រ្តាលី ឥណ្ឌូណេស៉ី ឥណ្ឌា សហរដ្ឋអាមេរិក អ៊ុយក្រែន និងកាណាដា ជាដើម៕