(បាងកក)៖ ក្រុមហ៊ុនផ្គត់ផ្គង់ម៉ាស៊ីនត្រជាក់របស់ជប៉ុន Daikin Industries ប្រចាំប្រទេសថៃ បានប្រកាសផ្អាកប្រតិបត្តិការ ចាប់ពីថ្ងៃទី៦ ខែធ្នូ ឆ្នាំ២០២៥ បន្ទាប់ពីមិនអាចឈានដល់កិច្ចព្រមព្រៀង ក្នុងការចរចា​​វិវាទការងារជាមួយសហជីព ពាក់ព័ន្ធប្រាក់​លើកទឹកចិត្តប្រចាំឆ្នាំ និងការ​ផ្តល់​អត្ថប្រយោជន៍នានាដល់បុគ្គលិក ដែលបម្រើការងារយូរឆ្នាំ។ នេះបើ​តាម​ការចេញផ្សាយដោយ សារព័ត៌មានថៃ The Nation នាថ្ងៃសុក្រ ទី៥ ខែធ្នូ ឆ្នាំ២០២៥។

បញ្ហាវិវាទបានផ្តើមចេញពីសំណើរបស់ក្រុមហ៊ុន ក្នុងការផ្តល់ប្រាក់​សុទ្ធ​ចំនួន៤០ ០០០បាត ជំនួសឱ្យមាសទម្ងន់ ៣បាត (៤៦ក្រាម) សម្រាប់​បុគ្គលិកនានា ដែលធ្វើការឱ្យក្រុមហ៊ុន បានរយៈពេលលើស១០ឆ្នាំ។ ខាង​សហជីព បានបដិសេធចំពោះសំណើរបស់ក្រុមហ៊ុន ដោយចាត់ទុកវាជា ការ​កាត់បន្ថយអត្ថប្រយោជន៍របស់បុគ្គលិក ហើយជាការបំពានកិច្ច​សន្យា​កាងារ។

អំឡុងកិច្ចចរចាជុំទី១០ ក្រុមហ៊ុន Daikin បានស្នើផ្តល់ប្រាក់លើក​ទឹកចិត្ត​ប្រចាំឆ្នាំ ស្មើនឹងប្រាក់ខែចំនួន៦ខែរបស់បុគ្គលិក បូកជាមួយប្រាក់១២ ០០០បាត និង៤០ ០០០បាត ជំនួសឱ្យមាសទម្ងន់៣បាត សម្រាប់​បុគ្គលិក​ ដែលធ្វើការជាមួយក្រុមហ៊ុនអស់រយៈពេលលើស១០ឆ្នាំ។ តម្លៃមាសទម្ងន់​៣បាត ឬ៤៥ក្រាម គឺគិតតាមហាងឆេងបច្ចុប្បន្ន គឺស្មើនឹងជាង ៦០០០​ដុល្លារអាមេរិក ខណៈលុយ ៤០ ០០០បាត គឺស្មើជាង១២៥០ដុល្លារ​ប៉ុណ្ណោះ​។

គួរបញ្ជាក់ថា ក្នុងឆ្នាំសារពើពន្ធកន្លងទៅ ក្រុមហ៊ុន Daikin Industries រកប្រាក់ចំណេញបានរហូតដល់ ៥.៩ពាន់លានបាត។ ក្រុមហ៊ុនបាន​សង្កត់​ធ្ងន់ថា ការផ្អាកប្រតិបត្តិការនេះ គឺជាសកម្មភាពដែលត្រូវបានអនុញ្ញាត ក្រោម​ច្បាប់ការងាររបស់ប្រទេសថៃ ក្នុងករណីដែលមិនអាចឈានដល់​កិច្ច​ព្រម​ព្រៀង៕