(ហ៊្សេរុយសាឡិម)៖ ការិយាល័យរដ្ឋមន្រ្តីការពារជាតិអ៉ីស្រាអែល នាថ្ងៃសុក្រនេះបានឱ្យដឹងថា កញ្ចប់ថវិកាការពារជាតិអ៉ីស្រាអែល សម្រាប់ឆ្នាំ២០២៦ ត្រូវបានកំណត់មានចំនួន ៣៤.៦៣ពាន់លានដុល្លារ លើសពីចំនួនដែលត្រូវបានកំណត់ ក្នុងសំណើព្រាងមុន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី៥ ខែធ្នូ ឆ្នាំ២០២៥។

រដ្ឋមន្រ្តីការពារជាតិអ៉ីស្រាអែល លោក Israel Katz បានលើកឡើងថា យោធានឹងបន្តបំពេញតម្រូវការរបស់កងទ័ពអ៉ីស្រាអែល ហើយ​កាត់បន្ថយបន្ទុកលើក្រុមទាហានបម្រុង។ បើតាមការិយាល័យរបស់លោក លោក Katz បាននិយាយយ៉ាងដូច្នេះថា «យើង​នឹងបន្តធ្វើសកម្មភាពយ៉ាងម៉ឺងម៉ាត់ ដើម្បីពង្រឹងកងកម្លាំងយោធា ហើយឆ្លើយតបយ៉ាងពេញលេញ ចំពោះតម្រូវការកងទ័ពយើង និង​​កាត់បន្ថយបន្ទុកលើទាហានបម្រុង ក្នុងគោលដៅធានាសន្តិភាពនៃរដ្ឋអ៉ីស្រាអែល នៅគ្រប់ជ្រុងទាំងអស់»។

គួរបញ្ជាក់ថា សង្រ្គាមហ្កាហ្សា គឺជាសង្រ្គាមដ៏ថ្លៃមួយសម្រាប់អ៉ីស្រាអែល ដែលបានចំណាយថវិកា៣១ពាន់លានដុល្លារ កាលពីឆ្នាំ​២០២៤ ក្នុងជម្លោះយោធាជាមួយក្រុមហាម៉ាស និងជាមួយក្រុមហេសបូឡា នៅឯប្រទេសលីបង់។ ប៉ុន្តែតាំងពីពេលនោះមក អ៉ីស្រាអែលឥឡូវសម្រេចបាន កិច្ចព្រមព្រៀងឈប់បាញ់ជាមួយក្រុមសកម្មប្រយុទ្ធទាំងពីរហើយ។

រដ្ឋមន្រ្តីហិរញ្ញវត្ថុអ៉ីស្រាអែល លោក Bezalel Smotrich បាននិយាយថា «យើងកំពុងកំណត់កញ្ចប់ថវិកាធំមួយ ដើម្បីបន្តពង្រឹងកងទ័ពយើងក្នុងឆ្នាំនេះ ប៉ុន្តែវាក៏អនុញ្ញាតឱ្យយើង​នាំប្រទេសអ៉ីស្រាអែលត្រឡប់ទៅរកគន្លងផ្លូវ នៃភាពរីកចម្រើននិងភាពធូរស្រាល សម្រាប់ពលរដ្ឋខ្លួនផងដែរ»៕