(តៃប៉ិ)៖ អាជ្ញាធរតៃវ៉ាន់បានប្រកាសនៅថ្ងៃសុក្រនេះថា ប្រទេសចិនបានដាក់ពង្រាយនាវាចម្បាំងជាច្រើនគ្រឿងសម្រាប់ «ប្រតិបត្តិការយោធា» ដែលលាតសន្ធឹងរាប់រយគីឡូម៉ែត្រចាប់ពីសមុទ្រលឿង រហូតដល់សមុទ្រចិនខាងត្បូង ដែលបង្កជាការគំរាមកំហែងដល់តំបន់ទាំងមូល។ នេះបើតាមការចេញផ្សាយ ដោយទីភ្នាក់ងារសារព័ត៌មាន AFP។

អ្នកនាំពាក្យការិយាល័យប្រធានាធិបតីតៃវ៉ាន់ លោកស្រី ខារិន គួ (Karen Kuo) បានបញ្ជាក់ថា ក្រសួងការពារជាតិកំពុងតាមដានសកម្មភាពនេះយ៉ាងដិតដល់ និងមានទំនុកចិត្តក្នុងការគ្រប់គ្រងស្ថានការណ៍។ ប្រភពសន្តិសុខមួយបានបង្ហើបថា ចំនួននាវាចិនដែលចូលរួមមានចំនួន «គួរឱ្យកត់សម្គាល់»។

ប្រតិបត្តិការនេះគ្របដណ្តប់តំបន់ទូលំទូលាយ រួមទាំងសមុទ្រចិនខាងកើត ក្បែរកោះតៀវអ៊ី (Diaoyu) និងមហាសមុទ្រប៉ាស៊ីហ្វិកខាងលិច។ តៃវ៉ាន់បានជំរុញឱ្យចិន «រក្សាការអត់ធ្មត់»។

ចំណែកឯទីក្រុងប៉េកាំងវិញ មិនបានបញ្ជាក់ពីព័ត៌មាននេះត្រង់ៗទេ ប៉ុន្តែអ្នកនាំពាក្យក្រសួងការបរទេស លោក លីន ជាន (Lin Jian) បានថ្លែងថា កងទ័ពជើងទឹកចិនប្រតិបត្តិការស្របតាមច្បាប់ និងបានជំរុញឱ្យភាគីពាក់ព័ន្ធកុំប្រតិកម្មហួសហេតុ ឬបង្កើតព័ត៌មានគ្មានមូលដ្ឋាន។

គួរបញ្ជាក់ថា ប្រធានចារកម្មតៃវ៉ាន់ លោក សៃ មីងយេន (Tsai Ming-yen) ធ្លាប់បានព្រមានថា ចន្លោះខែតុលា ដល់ធ្នូ គឺជារដូវកាលនៃសមយុទ្ធវាយតម្លៃប្រចាំឆ្នាំរបស់ចិន ហើយចិនអាចបង្វែរសកម្មភាពយោធាធម្មតាទៅជាសមយុទ្ធដែលមានគោលដៅវាយប្រហារតៃវ៉ាន់៕