(អូតាវ៉ា)៖ ប្រទេសកាណាដា នាថ្ងៃសុក្រសប្តាហ៍នេះ (ពេលវេលានៅកាណាដា) បានសម្រេចដកប្រទេសស៉ីរី ចេញពីបញ្ជីរបស់ខ្លួននៃរដ្ឋដែលគាំទ្រភេរវកម្ម ហើយលុបចោលការចាត់ថ្នាក់ ក្រុម Hayat Tahrir al-Sham's (HTS) ជាអង្គការភេរវករ ដែលនេះ​គឺជាការចូលរួមជាមួយប្រទេសដទៃទៀត ដើម្បីបន្ធូរបន្ថយទណ្ឌកម្មលើទីក្រុងដាម៉ាស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសៅរ៍ ទី៦ ខែធ្នូ ឆ្នាំ២០២៥។

ការសម្រេចដូចខាងលើ គឺបន្ទាប់ពីក្រុម HTS បានដឹកនាំកងកម្លាំងឧទ្ទាមនៅស៉ីរី ផ្តួលរំលំអតីតប្រធានាធិបតី លោក Bashar al-Assad កាលពីខែធ្នូ ឆ្នាំ២០២៤ ហើយឡើងគ្រប់គ្រងប្រទេស។ ក្រសួងការបរទេសកាណាដា បាននិយាយក្នុងសេចក្តីថ្លែងការណ៍ដូច្នេះថា «សេចក្តីសម្រេចនេះ គឺស្របតាមការសម្រេចចិត្តនាពេលថ្មីៗនេះ ដោយសម្ព័ន្ធមិត្តរបស់យើង រួមមានទាំងចក្រភពអង់គ្លេស និងសហរដ្ឋអាមេរិក ហើយវាកើតមានឡើង ក្រោយកិច្ចប្រឹងប្រែងពីសំណាក់​រដ្ឋាភិបាលអន្តរកាលរបស់ស៉ីរី ក្នុងការកសាងស្ថិរភាពក្នុងប្រទេសឡើងវិញ»។

គួរបញ្ជាក់ថា កាណាដាបានកត់ឈ្មោះស៉ីរីចូលបញ្ជីរដ្ឋគាំទ្រភេរវកម្ម កាលពីឆ្នាំ២០១២ នៅពេលដែលការបង្រ្កាបយ៉ាងសាហាវរបស់​លោក Assad លើចលនាបាតុកម្មគាំទ្រលទ្ធិប្រជាធិបតេយ្យ បានរុញច្រានប្រទេសឱ្យធ្លាក់ចូលសង្រ្គាមស៉ីវិល។ ក្រុម HTS ត្រូវបានដាក់ទណ្ឌកម្មយ៉ាងទូលំទូលាយ ដោយសារតែការជាប់ពាក់ព័ន្ធជាមួយ ក្រុមភេរវករ Al-Qaeda ប៉ុន្តែប្រទេសលោកខាងលិចមួយចំនួន បានចាប់ផ្តើមដកក្រុមនេះចេញពីបញ្ជីខ្មៅវិញ ដើម្បីលើកកម្ពស់កិច្ចសហប្រតិបត្តិការឱ្យប្រសើរ ជាមួយរដ្ឋាភិបាល​និងប្រធានាធិបតីស៉ីរីថ្មី ដែលជាអតីតជនសកម្មប្រយុទ្ធ​លោក Ahmed al-Sharaa៕