(អាមេរិក)៖ ក្រុមអ្នកចរចារបស់អ៊ុយក្រែន និងក្រុមបេសកជនរបស់ប្រធានាធិបតី លោក ដូណាល់ ត្រាំ នាថ្ងៃសៅរ៍នេះ (ពេលវេលានៅអាមេរិក) នឹងបន្តកិច្ចពិភាក្សាថ្ងៃទី៣ នៅទីក្រុង Miami នៃសហរដ្ឋអាមេរិក ហើយពួកគេបានឯកភាពគ្នាថា វឌ្ឍនភាពជាក់ស្តែងក្នុងការប្រឹងប្រែងស្វែងរកកិច្ចព្រមព្រៀងសន្តិភាព គឺអាស្រ័យទៅលើរុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសៅរ៍ ទី៦ ខែធ្នូ ឆ្នាំ២០២៥។

ក្នុងសេចក្តីថ្លែងការណ៍មួយនាថ្ងៃសុក្រ បេសកជនពិសេសអាមេរិក លោក Steve Witkoff បានប្រាប់ឱ្យដឹងយ៉ាងដូច្នេះថា «ភាគីទាំងពីរបានយល់ស្របថា វឌ្ឍនភាពពិតប្រាកដ ដើម្បីឆ្ពោះទៅរកកិច្ចព្រមព្រៀងណាមួយ គឺអាស្រ័យទៅលើឆន្ទៈរបស់រុស្ស៉ី ក្នុងការបង្ហាញការប្តេជ្ញាឱ្យប្រាកដប្រជា ចំពោះសន្តិភាពឋិតថេរយូរអង្វែង ក្នុងនោះរួមមានជំហានដើម្បីបន្ធូរបន្ថយភាពតានតឹង និងបញ្ឈប់ការសម្លាប់មនុស្ស»។

គួរបញ្ជាក់ថា រយៈពេល២ថ្ងៃមកនេះ លោក Witkoff និងកូនប្រសាលោក ត្រាំ លោក Jared Kushner បានជួបជជែកគ្នាជាមួយក្រុមមន្រ្តីចរចារបស់អ៊ុយក្រែន ហើយភាគីទាំងពីរបានអះអាងថា កិច្ចពិភាក្សាមានភាពស្ថាបនា និងទទួលបានវឌ្ឍនភាពឆ្ពោះទៅរក​ផ្លូវដែលអាចជឿជាក់បានមួយ សម្រាប់សន្តិភាពដែលមានយុត្តិធម៌ និងឋិតថេរនៅអ៊ុយក្រែន។ វាគឺជាជំនួបលើកទី៦រវាងភាគីទាំងពីរ ក្នុងរយៈពេល​២សប្តាហ៍ ហើយកើតឡើង បន្ទាប់ពីលោក Witkoff និងលោក Kushner បានទៅជួបប្រធានាធិបតីរុស្ស៉ី លោក វ៉្លាឌីមៀ ពូទីន ដល់ទីក្រុងមូស្គូ ក្នុងសប្តាហ៍នេះ៕