(វ៉ាស៉ីនតោន)៖ ផែនការយុទ្ធសាស្រ្តថ្មីមួយរបស់សហរដ្ឋអាមេរិក បានបង្ហាញថា ប្រធានាធិបតី លោក ដូណាល់ ត្រាំ មានគោលដៅ​ទប់ស្កាត់ការផ្ទុះជម្លោះជាមួយចិន ជុំវិញបញ្ហាតៃវ៉ាន់ក៏ដូចជាសមុទ្រចិនខាងត្បូង តាមរយៈការបង្កើនអំណាចយោធារបស់អាមេរិក និង​សម្ព័ន្ធមិត្ត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសៅរ៍ ទី៦ ខែធ្នូ ឆ្នាំ២០២៥។

រដ្ឋបាលរបស់លោក ត្រាំ បានបង្ហាញចេញវិធីសាស្រ្តឆ្លើយតបរបស់ខ្លួន ចំពោះបញ្ហាតៃវ៉ាន់ដែលជាបញ្ហាការទូតដ៏រសើបបំផុតមួយនៅលើពិភពលោក ក្នុងឯកសារយុទ្ធសាស្រ្តសន្តិសុខជាតិផ្លូវការ ដែលចេញផ្សាយកាលពីថ្ងៃសុក្រ។ វាកើតឡើងចំពេលដែល ទីក្រុងប៉េកាំងបង្កើនសម្ពាធលើតៃវ៉ាន់និងជប៉ុន ដោយដាក់ពង្រាយនាវាយោធាយ៉ាងច្រើនសម្បើម នៅពាសពេញដែនទឹកតំបន់អាស៉ីបូព៌ាក្នុងសប្តាហ៍នេះ ដែលជាការដំឡើងសាច់ដុំធំបំផុត គិតមកទល់បច្ចុប្បន្ន។

ឯកសារខាងលើបានលើកឡើងយ៉ាងដូច្នេះថា «ការទប់ស្កាត់ជម្លោះជុំវិញបញ្ហាតៃវ៉ាន់ ដែលប្រសើរបំផុតតាមរយៈការបង្កើនអំណាចយោធាលើសលប់ គឺជាអាទិភាពមួយ។ យើងនឹងកសាងអំណាចយោធា ដែលអាចរារាំងការរំលោភបំពានគ្រប់ទីកន្លែង នៅតំបន់លាតសន្ធឹងពីជប៉ុន រហូតដល់អាស៉ីអាគ្នេយ៍។ ប៉ុន្តែយោធាអាមេរិក មិនអាច ហើយក៏មិនគួរត្រូវធ្វើបែបនោះ តែម្នាក់ឯងឡើយ។ សម្ព័ន្ធមិត្តរបស់យើង ចាំបាច់ត្រូវតែបង្កើនការចូលរួមចំណែក ហើយ​សំខាន់បំផុតនោះ គឺចំណាយឱ្យច្រើនខ្លាំងមុន សម្រាប់កិច្ចប្រឹងប្រែងការពារខ្លួនរួមគ្នា។ ប្រការនេះនឹងពង្រឹងសមត្ថភាពរបស់​អាមេរិក ព្រមទាំងសម្ព័ន្ធមិត្ត ក្នុងការទប់ស្កាត់ការប៉ុនប៉ងណាមួយ ដែលចង់ដណ្តើមកាន់កាប់តៃវ៉ាន់ ឬជំហានណាមួយផ្សេងទៀត ដែលអាចធ្វើឱ្យការការពារដែនកោះនោះ ជារឿងមិនអាចទៅរួច»។

គួរបញ្ជាក់ថា ដោយចង់ស្វែងរកទំនាក់ទំនងជិតស្និទ្ធជាមួយប្រធានាធិបតីចិន លោក ស៉ី ជីនពីង លោក ត្រាំ ហាក់បានចៀសវាង​និយាយចំៗ អំពីរបៀបដែលរូបលោកនឹងឆ្លើយតប ចំពោះការកើនឡើងនៃភាពតានតឹងជុំវិញតៃវ៉ាន់។ វាផ្ទុយពីអតីតប្រធានាធិបតី លោក ចូ​ បៃដិន ដែលអំឡុងពេលកាន់អំណាចឆ្នាំ២០២១-២០២៥ ធ្លាប់បានលើកឡើងជាច្រើនដងថា អាមេរិកនឹងចូលការពារ​តៃវ៉ាន់ ប្រសិនបើចិនវាយលុក។ កាលពីខែមុន នៅពេលនាយករដ្ឋមន្រ្តីជប៉ុន លោកស្រី Sanae Takaichi បានធ្វើឱ្យចិនខឹងសម្បារជាខ្លាំង ដោយនិយាយថា ជប៉ុនអាចនឹងធ្វើអន្តរាគមន៍យោធា ក្នុងករណីចិនវាយតៃវ៉ាន់ លោក ត្រាំ ត្រូវគេរាយការណ៍ថា បានប្រាប់ឱ្យលោកស្រី កុំបង្កើនកម្តៅថែមទៀត ក្នុងជម្លោះជាមួយចិន។

យ៉ាងណាមិញ លោក ត្រាំ ទើបតែបានចុះហត្ថលេខាលើច្បាប់អាមេរិកមួយ ដែលតម្រូវឱ្យរដ្ឋបាលលោក ពិនិត្យជាប្រចាំទៅលើ​របៀបដែលខ្លួនធ្វើប្រាស្រ័យទាក់ទងជាមួយទីក្រុងតៃប៉ិ។ មិនតែប៉ុណ្ណោះ រដ្ឋបាលលោកក៏បានអនុម័តផងដែរ នូវការលក់គ្រឿងបន្លាស់យន្តហោះចម្បាំង និងយន្តហោះយោធាផ្សេងទៀតឱ្យទៅកោះតៃវ៉ាន់ ក្នុងតម្លៃ៣៣០លានដុល្លារ។ ទាំងនេះត្រូវបានទីក្រុងតៃប៉ិកមើលឃើញថា ជាសញ្ញានៃការគាំទ្រ។ ទន្ទឹមគ្នា លោក ត្រាំ បានជំរុញឱ្យ​ជប៉ុន​និងកូរ៉េខាងត្បូង ដែលជាសម្ព័ន្ធមិត្ត២ដ៏សំខាន់នៅក្នុងតំបន់ ប្រឹងប្រែងបង្កើនការចំណាយលើវិស័យយោធា៕