(បាងកក)៖ ប្រទេសថៃនឹងត្រូវរៀបចំការបោះឆ្នោតមុនអាណត្តិមួយ បន្ទាប់ពីសំណើសុំំរំលាយសភារបស់នាយករដ្ឋមន្ត្រីថៃ លោក Anutin Charnvirakul ទទួលបានការយល់ព្រមពីព្រះមហាក្សត្រថៃ នៅថ្ងៃសុក្រ ទី១២ ខែធ្នូ ខណៈជម្លោះព្រំដែនជាមួយកម្ពុជានៅតែបន្ត ហើយរដ្ឋាភិបាលរបស់លោកត្រូវចាត់វិធានការបង្ការជាមុន សំដៅទប់ស្កាត់ញតិ្តបោះឆ្នោតដកសេចក្ដីទុកចិត្តរបស់គណបក្សប្រឆាំង។ លោក Anutin កាលពីថ្ងៃព្រហស្បតិ៍ ទី១១ ខែធ្នូ បានប្រកាសថាលោកសម្រេចចិត្តប្រគល់អំណាច ទៅឱ្យប្រជាជន ហើយព្រះមហាក្សត្របានអនុម័តយល់ព្រមលើញត្តិទាមទាររំលាយសភារបស់លោក ដែលនេះជាការត្រួសត្រាយផ្លូវឆ្ពោះទៅរកការរៀបចំការបោះឆ្នោតអាចនៅចុងខែមករា ឬដើមខែកុម្ភៈឆ្នាំក្រោយ។

ហ្គេមដែលលោក Anutin កំពុងលេងកើតឡើងចំពេលជម្លោះប្រដាប់អាវុធនៅតាមបណ្ដោយព្រំដែនរវាងកម្ពុជា និងថៃ បានឈានចូលដល់ថ្ងៃទី៥។ កាលពីថ្ងៃព្រហស្បតិ៍ផងដែរ ប្រធានាធិបតីអាមេរិក លោក ដូណាល់ ត្រាំ ដែល បានធ្វើអន្តរាគមន៍បញ្ឈប់សង្រ្គាមម្ដងរួចមកហើយកាលពីខែកក្កដា បានបញ្ជាក់ឡើងវិញថារូបលោកនឹងហៅទូរស័ព្ទជាមួយមេដឹកនាំកម្ពុជា និងថៃ ដើម្បីបញ្ចប់ជម្លោះ។

* រឿងភាគនយោបាយដដែលៗ

ការសម្រេចចិត្តរបស់លោក Anutin ក្នុងការរំលាយសភាធ្វើឡើងមិនទាន់គ្រប់១០០ថ្ងៃផង ក្រោយរូបលោកឡើងកាន់តំណែងជានាយករដ្ឋមន្ត្រីដឹកនាំរដ្ឋាភិបាលសំឡេងភាគតិច និងចំពេលរឿងភាគនយោបាយដដែលៗ បានកើតឡើង នៅក្នុងរដ្ឋសភាថៃ ដែលបានជំរុញឱ្យមានការរំពឹងថាគណបក្សប្រជាជនដែលជាបក្សប្រឆាំងធំបំផុតក្នុងរដ្ឋសភា អាចនឹងដាក់ញត្តិទាមទារឱ្យរៀបចំការបោះឆ្នោតដកសេចក្ដីទុកចិត្តប្រឆាំងនឹងរូបលោក។ ការបោះឆ្នោតសកលមុនអាណត្តិ ដែលនឹងត្រូវធ្វើឡើងក្នុងពេលពី ៤៥ ដល់៦០ថ្ងៃ ក៏បាន និងកំពុងបង្កើនលទ្ធភាពនៃការផ្ទុះឡើងនូវភាពចលាចលនយោបាយនៅក្នុងប្រទេសថៃ ជាប្រទេសមួយដែលរដ្ឋាភិបាលជាប់ឆ្នោត និងគណបក្សនយោបាយជាច្រើនត្រូវបាន បណ្ដេញចេញពីអំណាចតាមរយៈរដ្ឋប្រហារ និងសាលក្រមតុលាការ ក្នុងពេលជាង២ទសវត្សរ៍មកនេះ។ លោក Anutin ត្រូវបានរដ្ឋសភាថៃជ្រើសតាំងជានាយករដ្ឋមន្ត្រីកាលពីខែកញ្ញា បន្ទាប់ពីតុលាការកំពូលចេញសាលក្រម ដកលោកស្រី Paetongtarn Shinawatra ពីតំណែងជានាយករដ្ឋមន្ត្រី។ ការឡើងកាន់អំណាចរបស់លោក Anutin ទៀតសោតអាចធ្វើទៅបាន គឺដោយសារតែមានការគាំទ្រពីគណបក្សប្រជាជន ក្រោមលក្ខខណ្ឌដំណើរការ នីតិវិធីធ្វើវិសោធនកម្មរដ្ឋធម្មនុញ្ញ និងរំលាយសភាដែលដំបូងឡើយគ្រោងនឹងធ្វើនៅខែមករា ឆ្នាំ២០២៦។

ប៉ុន្តែ ការប្រេះឆាគ្នារវាងគណបក្សទាំង២បានកើតឡើងកាលពីថ្ងៃព្រហស្បតិ៍ ជុំវិញការបោះឆ្នោតលើនីតិវិធីធ្វើវិសោធនកម្មរដ្ឋធម្មនុញ។ មេដឹកនាំគណបក្សប្រឆាំង លោក Natthaphong Ruengpanyawut បាននិយាយថា គណបក្សរបស់លោក Anutin បានក្បត់ពាក្យសន្យាដែលមាននៅក្នុងកិច្ចព្រមព្រៀងរវាងគណបក្សទាំង២ ខណៈអ្នកនាំពាក្យរដ្ឋាភិបាលបាននិយាយថាញត្តិដកសេចក្ដីទុកចិត្តកំពុងត្រូវបានគ្រោងទុក។

* បញ្ហាប្រឈមក្នុងការបោះឆ្នោតសម្រាប់លោក Anutin

លោក Anutin ដែលជាអ្នកនយោបាយឱកាសនិយមម្នាក់ និងជានាយករដ្ឋមន្ត្រីទី៣របស់ថៃ ក្នុងពេល២ឆ្នាំមកនេះ កំពុងប្រឈមនឹងការតស៊ូដ៏លំបាកមួយដើម្បីអាចជាប់ឆ្នោតជានាយករដ្ឋមន្ត្រីម្ដងទៀត ខណៈការស្ទង់មតិបានបង្ហាញថា គណបក្សប្រជាជនគឺជាគណបក្សមានប្រជាប្រិយភាពជាងគេបំផុតនៅក្នុងប្រទេសថៃ។ គណបក្សឆ្ពោះទៅមុខដែលជាគណបក្សដើមរបស់គណបក្សប្រជាជនបានទទួលជ័យជម្នះក្នុងការបោះឆ្នោតកាលពីឆ្នាំ២០២៣ ប៉ុន្តែត្រូវបានរារាំងមិនឱ្យ បង្កើតរដ្ឋាភិបាលដោយក្រុមសមាជិកសភាជាមួយសម្ព័ន្ធមិត្តរបស់យោធា និងមានភក្ដីភាពចំពោះព្រះមហាក្សត្រថៃ។ លោក Anutin កាលពីថ្ងៃសុក្រ ទី១២ ខែធ្នូ បានប្រាប់ក្រុមអ្នកសារព័ត៌មានថាការសម្រេចចិត្តរបស់លោកក្នុង ការរំលាយសភា នឹងមិនប៉ះពាល់ដល់ប្រតិបត្តិការរបស់យោធាថៃក្នុងជម្លោះជាមួយកម្ពុជានោះទេ ហើយអ្នកនាំពាក្យរដ្ឋាភិបាលថៃ លោក Siripong Angkasakulkiat ថែមទាំងប្រាប់ Nation TV ទៀតផងថារដ្ឋាភិបាលចាំផ្ទះរបស់លោក Anutin មានសិទ្ធិអំណាចពេញលេញ៕