(ណៃពិដោ)៖ នាថ្ងៃពុធនេះ របបសឹកនៃប្រទេសមីយ៉ាន់ម៉ា បានឱ្យដឹងថា ខ្លួនកំពុងព្យាយាមស្វែងរកការកាត់ទោសមនុស្សសរុបជាង២០០នាក់ សម្រាប់ការប៉ុនប៉ងរារាំងដំណើរការបោះឆ្នោត ដែលនឹងចាប់ផ្តើមប្រព្រឹត្តទៅ នាចុងខែនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី១៧ ខែធ្នូ ឆ្នាំ២០២៥។

របបសឹកអះអាងថា ការបោះឆ្នោតសកលជាដំណាក់កាល ចាប់ផ្តើមពីថ្ងៃទី២៨ ខែធ្នូនេះ គឺជាការបោះជំហានសំខាន់មួយ ដើម្បីឆ្ពោះទៅរក​ការផ្សះផ្សារជាតិនៅក្នុងប្រទេសមីយ៉ាន់ម៉ា ដែលត្រូវបានហែកហួរដោយសង្រ្គាមស៉ីវិល ចាប់តាំងពីយោធាបានធ្វើរដ្ឋប្រហារដណ្តើមអំណាច កាលពីឆ្នាំ២០២១មក។ ពួកក្រុមឧទ្ទាម គ្រោងនឹងមិនអនុញ្ញាតឱ្យការបោះឆ្នោតដំណើរការ នៅក្នុងតំបន់ដែលពួកគេគ្រប់គ្រងដាច់ខាត ខណៈក្រុមអ្នកសង្កេតការណ៍អន្តរជាតិ កន្លងមកបានរិះគន់ការបោះឆ្នោតនេះថា គ្រាន់តែជាលេសដើម្បីបន្តអំណាចរបស់យោធាប៉ុណ្ណោះ។

កាលពីខែកក្កដា ឆ្នាំនេះ របបសឹកបានដាក់ចេញច្បាប់មួយ ដើម្បីការពារដំណើរការបោះឆ្នោតរបស់ខ្លួន ដោយក្នុងនោះហាមឃាត់ការរិះគន់ ឬការធ្វើបាតុកម្មប្រឆាំងការបោះឆ្នោត ហើយជនដែលល្មើសនឹងត្រូវប្រឈមការដាក់ទោសធ្ងន់ធ្ងរ។ នាថ្ងៃពុធនេះ លោក Tun Tun Naung រដ្ឋមន្រ្តីមហាផ្ទៃរបស់របបសឹក បានឱ្យដឹងថា អាជ្ញាធរកំពុងព្យាយាមស្វែងរក ការកាត់ទោសមនុស្សសរុបចំនួន ២២៩នាក់ នៅក្រោមច្បាប់ថ្មីនោះ សម្រាប់ការប៉ុនប៉ងបំផ្លិចបំផ្លាញដំណើរការបោះឆ្នោត។

ប្រសិនបើត្រូវបានរកឃើញមានទោសក្រោមច្បាប់ខាងលើ ជនល្មើសអាចប្រឈមការជាប់ពន្ធនាគាររហូតដល់មួយទសវត្សរ៍ ហើយ​កន្លងមកនេះ សូម្បីតែការចុច like នៅលើការបង្ហោះនានា តាម Facebook ដែលមានខ្លឹមសាររិះគន់ដំណើរការបោះឆ្នោត ក៏ត្រូវបានអាជ្ញាធរឃាត់ខ្លួនដែរ។ មិនតែប៉ុណ្ណោះ ច្បាប់នោះហាមឃាត់ការបំផ្លាញសន្លឹកឆ្នោត និងមណ្ឌលបោះឆ្នោត ព្រមទាំង​ការសម្លុតគំរាមឬការប្រើហិង្សាទៅលើអ្នកបោះឆ្នោត បេក្ខជនឈរឈ្មោះ ក៏ដូចជាបុគ្គលិកធ្វើការនៅមណ្ឌលបោះឆ្នោត ខណៈអ្នកដែលល្មើស នឹងប្រឈមការជាប់ពន្ធនាគារអតិបរមា២០ឆ្នាំ។

កាលពីសប្តាហ៍មុន របបសឹកបានប្រកាសថា កំពុងស្វែងរកការចាប់ខ្លួនសកម្មជន១០នាក់ ដែលបានធ្វើបាតុកម្មប្រឆាំង​ការបោះឆ្នោតនៅទីក្រុង Mandalay។ រីឯកាលពីខែកញ្ញា បុរសម្នាក់ ត្រូវបានផ្តន្ទាទោសដាក់ពន្ធនាគាររយៈពេល៧ឆ្នាំ ក្រោយ​បង្ហោះសារលើ Facebook រិះគន់ការបោះឆ្នោត ហើយមួយខែក្រោយមក សិល្បៈករ៣រូប ក៏ត្រូវបានចាប់ខ្លួនផងដែរ សម្រាប់​ការបញ្ចេញ​មតិរិះគន់ នៅលើបណ្តាញសង្គមរបស់សិល្បៈករដទៃទៀត ដែលផលិតភាពយន្តគាំទ្រការបោះឆ្នោតរបស់យោធា។

គួរបញ្ជាក់ថា បើតាមអង្គការ Assistance Association for Political Prisoners អ្នកទាំងឡាយ ដែលត្រូវបានកាត់ទោសដាក់ពន្ធនាគារ ក្រោមច្បាប់ខាងលើ នឹងចូលរួមជាមួយ មនុស្សច្រើនជាង ២២ ០០០នាក់ ដែលត្រូវបានរបបសឹកចាប់ឃុំឃាំង ក្រោមហេតុផលនយោបាយ ក្នុងនោះរួមមានទាំងអតីតមេដឹកនាំ លោកស្រី អោងសាន ស៊ូជី ដែលត្រូវបានយោធាទម្លាក់ពីអំណាច កាលពីឆ្នាំ២០២១៕