នីហ្សេរីយ៉ា៖ ក្មេងៗសិស្សសាលា ១៣០នាក់ត្រូវបានជួយសង្រ្គោះ ក្រោយពួកភេរវករចាប់ពង្រត់
22-12-2025 16:02
(YENAGOA)៖ អ្នកនាំពាក្យប្រធានាធិបតីនីហ្សេរីយ៉ា បានឱ្យដឹងថា សិស្សសាលាក្មេងៗនៅសល់ចំនួន ១៣០នាក់ ដែលត្រូវបានចាប់ពង្រត់ពីសាលារៀនកាតូលិកមួយ ក្នុងរដ្ឋ Niger កាលពីខែវិច្ឆិកា ត្រូវបានជួយសង្រ្គោះ និងមានសេរីភាពឡើងវិញហើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២២ ខែធ្នូ ឆ្នាំ ២០២៥។
លោក Bayo Onanuga និយាយថា សិស្សសាលា ១៣០នាក់ ដែលត្រូវក្រុមភេរវករចាប់ពង្រត់យកទៅ រំពឹងថានឹងមកដល់ទីក្រុង Minna នាថ្ងៃចន្ទនេះ ហើយជួបជុំឪពុកម្តាយរបស់ពួកគេឡើងវិញ សម្រាប់ការប្រារព្ធពិធីបុណ្យណូអែល។ យោធាបានធ្វើប្រតិបត្តិការ ដើម្បីរំដោះពួកគេ។
សិស្សទាំងនោះ ស្ថិតក្នុងចំណោមសិស្សជាង ៣០០នាក់ និងបុគ្គលិក ១២នាក់ ដែលខ្មាន់កាំភ្លើងបានចាប់ពីសាលារៀន St Mary's Catholic ក្នុងភូមិ Papiri កាលពីថ្ងៃទី២១ ខែវិច្ឆិកា។ សមាគមគ្រិស្តបរិស័ទនៃប្រទេសនីហ្សេរីយ៉ា និយាយថា ក្មេងចំនួន ៥០នាក់បានរត់រួចពីការចាប់ពង្រត់នោះ។ កាលពីថ្ងៃទី៨ ខែធ្នូ រដ្ឋាភិបាលនីហ្សេរីយ៉ា បានអះអាងថាសង្រ្គោះមនុស្ស ១០០នាក់ បូកបន្ថែម ១៣០នាក់ទៀត គឺសរុប ២៣០នាក់៕
