(ប៉េកាំង)៖ កាលពីថ្ងៃចន្ទ ទី២២ ខែធ្នូ ក្រសួងការបរទេសចិន បាននិយាយថា ការរឹបអូសកប៉ាល់១គ្រឿងទៀតដោយសហរដ្ឋអាមេរិក គឺជាទង្វើរំលោភបំពានធ្ងន់ធ្ងរចំពោះច្បាប់អន្តរជាតិ បន្ទាប់ពីអាមេរិកបានស្ទាក់ចាប់កប៉ាល់ដឹកប្រេង១គ្រឿង ដែលមានគោលដៅឆ្ពោះ​មកកាន់ប្រទេសចិន នៅក្បែរឆ្នេរប្រទេសវ៉េណេស៊ុយអេឡា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសចិន លោក Lin Jian បាននិយាយថា វ៉េណេស៊ុយអេឡា មានសិទ្ធិអភិវឌ្ឍទំនាក់ទំនងជាមួយបណ្តាប្រទេសដទៃទៀត ហើយចិនជំទាស់ការដាក់ទណ្ឌកម្មនានា ដែលមានលក្ខណៈឯកតោភាគី និងខុសច្បាប់។

កាលពីថ្ងៃសៅរ៍ចុងសប្តាហ៍មុន ឆ្មាំសមុទ្រអាមេរិកបានស្ទាក់ចាប់ កប៉ាល់ដឹកប្រេងទី២ នៅក្នុងដែនទឹកអន្តរជាតិ ក្បែរឆ្នេរវ៉េណេស៊ុយអេឡា ប៉ុន្មានថ្ងៃបន្ទាប់ពីប្រធានាធិបតី លោក ដូណាល់ ត្រាំ បានប្រកាសរាំងខ្ទប់កប៉ាល់ដឹកប្រេងជាប់ទណ្ឌកម្មទាំងអស់ មិនឱ្យចេញឬចូលវ៉េណេស៊ុយអេឡា។ ឯកសារបានបង្ហាញថា កប៉ាល់ដឹកប្រេងនោះមានឈ្មោះពិត Centuries បានចូលយកប្រេងនៅវ៉េណេស៊ុយអេឡា ក្រោមឈ្មោះក្លែងក្លាយ Crag និងផ្ទុក​ប្រេងវ៉េណេស៊ុយអេឡា Merey ប្រមាណ១.៨លានបារ៉ែល ដែលមានគោលដៅមកប្រទេសចិន។

គួរបញ្ជាក់ថា បើតាមការអះអាងរបស់អ្នកនាំពាក្យសេតវិមាន កប៉ាល់ខាងលើបានដឹកប្រេងជាប់ទណ្ឌកម្ម ហើយជាផ្នែកនៃក្រុមកប៉ាល់ស្រមោល ឬកប៉ាល់គេចវេះទណ្ឌកម្ម របស់វ៉េណេស៊ុយអេឡា។ រដ្ឋាភិបាលវ៉េណេស៊ុយអេឡា បានហៅការរឹបអូសកប៉ាល់នោះថា ជាទង្វើចោរសមុទ្រអន្តរជាតិ។ ចិនគឺជាអតិថិជនប្រេងធំបំផុតរបស់វ៉េណេស៊ុយអេឡា ដែលរ៉ាប់រ៉ង​ប្រហែល៤ភាគរយ នៃប្រេងឆៅនាំចូលសរុបរបស់ប្រទេសចិន៕