(ឡុងដ៏)៖ នៅក្នុងសេចក្តីថ្លែងការណ៍រួមគ្នាមួយ ចក្រភពអង់គ្លេស កាណាដា បារាំង និងប្រទេសដទៃទៀត បានអំពាវនាវឱ្យអ៉ីស្រាអែលធ្វើសកម្មភាពជាបន្ទាន់ ដោយលើកឡើងពីស្ថានភាពមនុស្សធម៌កាន់តែអាក្រក់ទៅនៅតំបន់ហ្កាហ្សា ដែលគួរឱ្យព្រួយបារម្ភយ៉ាងខ្លាំង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៣១ ខែធ្នូ ឆ្នាំ ២០២៥។

តាមសេចក្តីថ្លែងការណ៍រួមដែលចេញដោយក្រសួងការបរទេសអង់គ្លេស អ៉ីស្រាអែល គួរតែអនុញ្ញាតឱ្យអង្គការមិនមែនរដ្ឋាភិបាល ធ្វើការនៅក្នុងប្រទេសអ៉ីស្រាអែល បានដោយងាយស្រួល និងយូរអង្វែង ហើយធានាថាអង្គការសហប្រជាជាតិ (UN) អាចបន្តការងាររបស់ខ្លួននៅក្នុងដែនដីប៉ាឡេស្ទីន។ រដ្ឋមន្រ្តីការបរទេសកាណាដា ដាណឺម៉ាក ហ្វាំងឡង់ បារាំង អៀរឡង់ ជប៉ុន ន័រវែស ស្វីស នូវែលសេឡង់ និងអង់គ្លេស គូសបញ្ជាក់ថា «ភាពយ៉ាប់យ៉ឺននៃស្ថានភាពមនុស្សធម៌ហ្កាហ្សា នៅតែជាមហន្តរាយ។ អ៉ីស្រាអែលគួរតែលុបចោល ការរឹតបន្តឹងមួយចំនួន រួមទាំងសម្ភារវេជ្ជសាស្ត្រ និងជម្រក ក៏ដូចជាការបើកច្រកព្រំដែន ដើម្បីបង្កើនលំហូរនៃជំនួយមនុស្សធម៌ទៅកាន់តំបន់ហ្កាហ្សា»។

គួរបញ្ជាក់ថា អ៉ីស្រាអែល និងក្រុមហាម៉ាស បានព្រមព្រៀងឈប់បាញ់គ្នា នៅក្នុងខែតុលា ពីរឆ្នាំបន្ទាប់ពីសង្រ្គាមដ៏បំផ្លាញនៅហ្កាហ្សា។ ក្រុមអ្នកឃ្លាំមើលស្ថានភាពអត់ឃ្លានជាសាកល បាននិយាយកាលពីថ្ងៃទី១៩ ខែធ្នូថា លែងមានទុរ្ភិក្សនៅហ្គាហ្សាទៀតហើយ បន្ទាប់ពីការផ្តល់អាហារមនុស្សធម៌ និងពាណិជ្ជកម្មមានភាពប្រសើរឡើងបន្ទាប់ពីបទឈប់បាញ់។

ក្រសួងការបរទេសអ៉ីស្រាអែល បានហៅសេចក្តីថ្លែងការណ៍រួមនោះថា ជាលំនាំនៃការរិះគន់បែបផ្តាច់ការ និងជាការទាមទារតែម្ខាងលើភាគីអ៉ីស្រាអែល ខណៈដែលមិនអើពើនឹងតម្រូវការចាំបាច់ ឱ្យក្រុមហាម៉ាសរំសាយអាវុធ៕