(តៃប៉ិ)៖ នាថ្ងៃពុធនេះ តៃវ៉ាន់បាននៅរក្សាការប្រុងជើងការខ្ពស់ដដែល បន្ទាប់ពីចិនបានធ្វើសមយុទ្ធយោធាទ្រង់ទ្រាយធំសម្បើម នៅក្បែរដែនកោះនេះ កាលពីថ្ងៃចន្ទនិងថ្ងៃអង្គារ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៣១ ខែធ្នូ ឆ្នាំ២០២៥។

តៃវ៉ាន់បាននិយាយថា ស្ថានការណ៍ហាក់បានស្ងប់ស្ងាត់វិញហើយ ដោយនាវារបស់ចិន បាននិងកំពុងដកថយចេញទៅវិញ ក៏ប៉ុន្តែ​ទីក្រុងប៉េកាំងមិនទាន់បានប្រកាសពី ការបិទបញ្ចប់សមយុទ្ធរបស់ខ្លួនជាផ្លូវការនៅឡើយទេ ដូច្នេះហើយ មជ្ឈមណ្ឌលឆ្លើយតបបន្ទាន់​របស់យោធា និងឆ្មាំសមុទ្រតៃវ៉ាន់ នៅបន្តដំណើរការដដែល។ នាព្រឹកថ្ងៃពុធនេះ ក្រសួងការពារជាតិតៃវ៉ាន់ បានឱ្យដឹងថា យន្តហោះយោធាចិន ៧៧គ្រឿង រួមជាមួយនាវាទ័ពជើងទឹក និងឆ្មាំសមុទ្រចិន២៥គ្រឿង បានធ្វើប្រតិបត្តិការនៅក្បែរដែនកោះនេះ ក្នុងរយៈពេល២៤ម៉ោងចុងក្រោយ។

អំឡុងសមយុទ្ធយោធាមានឈ្មោះថា Justice Mission 2025 កាលពីថ្ងៃចន្ទនិងថ្ងៃអង្គារសប្តាហ៍នេះ យោធាចិនបានបាញ់រ៉ុក្កែត​រាប់សិបគ្រាប់ សំដៅទៅកាន់តៃវ៉ាន់ ហើយបានដាក់ពង្រាយយន្តហោះ និងនាវាយោធាក្នុងចំនួនយ៉ាងច្រើន មកក្បែរដែនកោះនេះ ក្នុងសកម្មភាពដំឡើងសាច់ដុំ ដែលបានជំរុញឱ្យប្រទេសលោកខាងលិចមួយចំនួន ចេញមុខបង្ហាញក្តីបារម្ភ។ តៃវ៉ាន់ផ្ទាល់ បានថ្កោលទោស​សមយុទ្ធរបស់ចិនថា ជាការគំរាមកំហែងចំពោះសន្តិសុខនិងស្ថិរភាពក្នុងតំបន់ និងជាទង្វើបង្កហេតុច្បាស់ក្រឡែត។

គួរបញ្ជាក់ថា ចិនបានចាត់ទុកការធ្វើសមយុទ្ធរបស់ខ្លួន ជាចំណាត់ការចាំបាច់និងត្រឹមត្រូវ ដើម្បីរក្សាការពារអធិបតេយ្យជាតិ និង​បូរណភាពទឹកដីរបស់ខ្លួន ហើយវាគឺជាការព្រមានយ៉ាងម៉ឺងម៉ាត់មួយ ប្រឆាំងនឹងចលនាចង់បានឯករាជ្យរបស់តៃវ៉ាន់ ព្រមទាំង​កម្លាំងជ្រៀតជ្រែកពីខាងក្រៅ៕