(ណៃពិដោ)៖ រដ្ឋាភិបាលយោធានៃប្រទេសមីយ៉ាន់ម៉ា នាថ្ងៃពុធនេះ បានឱ្យដឹងថា ជាងពាក់កណ្តាល នៃអ្នកមានឈ្មោះក្នុងបញ្ជីបោះឆ្នោត បានទៅចូលរួមបោះឆ្នោតក្នុងដំណាក់កាលដំបូង នៃដំណើរការបោះឆ្នោតសកល ​សរុបមាន៣ដំណាក់កាល កាលពីចុងសប្តាហ៍មុន។ វាជាអត្រាទាបគួរឱ្យកត់សម្គាល់ បើប្រៀបធៀបជាមួយការបោះឆ្នោតសកល កាលពី២លើកកន្លងមក។ នេះបើតាមការចេញផ្សាយដោយ ទីភ្នាក់ងារព័ត៌មាន ​Reuters នាថ្ងៃពុធ ទី៣១ ខែធ្នូ ឆ្នាំ២០២៥។

វាគឺជាការបោះឆ្នោតសកលដំបូងបំផុត គិតចាប់តាំងពីរដ្ឋប្រហារយោធាកាលពីឆ្នាំ២០២១ និងប្រព្រឹត្តទៅទាំងអំឡុងពេលប្រទេសមីយ៉ាន់ម៉ា​ កំពុងបន្តហែកហួរដោយសង្រ្គាមស៉ីវិល។ ក្រុមអ្នកវិភាគរំពឹងថា គណបក្ស Union Solidarity and Development ដែលគាំទ្រដោយយោធា ហើយដឹកនាំដោយក្រុមឧត្តមសេនីយ៍ចូលនិវត្តន៍ នឹងវិលត្រឡប់មកកាន់អំណាច សាជាថ្មី។ អង្គការសហប្រជាជាតិ រួមជាមួយប្រទេសលោកខាងលិចមួយចំនួន និងក្រុមឃ្លាំមើលសិទ្ធិមនុស្ស បាននិយាយថា ការបោះឆ្នោតនេះ មិនមានលក្ខណៈសេរី យុត្តិធម៌ ឬជឿទុកចិត្តបាននោះឡើយ ដោយសារគណបក្សនយោបាយនានា ដែលប្រឆាំងរបបយោធា មិនបានចូលរួមប្រកួតប្រជែង ហើយការរិះគន់ការបោះឆ្នោត ត្រូវបានចាត់ទុកជាទង្វើខុសច្បាប់។

អ្នកនាំពាក្យរដ្ឋាភិបាលយោធា លោក Zaw Min Tun បានឱ្យដឹងថា មនុស្សជាង៦លាននាក់ ឬស្មើនឹង៥២.១៣ភាគរយ នៃអ្នកមានឈ្មោះក្នុងបញ្ជីបោះឆ្នោត បានចូលរួមបោះឆ្នោត កាលពីថ្ងៃអាទិត្យ ទី២៨ ខែធ្នូ នៅទូទាំងក្រុងចំនួន១០២។ លោក Zaw Min Tun បានធ្វើការកត់សម្គាល់ថា សូម្បីតែនៅក្នុងប្រទេសប្រជាធិបតេយ្យនិងអភិវឌ្ឍន៍ គឺនៅតែមានស្ថានការណ៍ ដែលអត្រា​អ្នកបោះឆ្នោត មានចំនួនមិនលើសពី៥០ភាគរយផង ដូច្នេះហើយអត្រាខាងលើនេះ គឺជាមោទនភាពមួយ។

គួរបញ្ជាក់ថា យោងតាមអង្គការ International Foundation for Electoral Systems ដែលមានមូលដ្ឋាននៅអាមេរិក អត្រាអ្នកបោះឆ្នោតក្នុងការបោះឆ្នោតសកល នៅប្រទេសមីយ៉ាន់ម៉ា កាលពីឆ្នាំ២០២០ និងឆ្នាំ២០១៥ គឺប្រហែល៧០ភាគរយ។ ការបោះឆ្នោតដំណាក់កាលបន្ទាប់ទៀត នឹងត្រូវធ្វើឡើងនៅថ្ងៃទី១១ ខែមករា និងថ្ងៃទី២៥ ខែមករា ឆ្នាំ២០២៦ នៅក្រុងសរុបចំនួន​២៦៥ ក្នុងចំណោមក្រុងទាំង៣៣០ របស់មីយ៉ាន់ម៉ា ប៉ុន្តែរដ្ឋាភិបាលយោធា មិនមានការគ្រប់គ្រងទាំងស្រុងលើតំបន់ទាំងអស់នោះ​​ឡើយ ដោយសារតែការប្រយុទ្ធគ្នាជាមួយ ក្រុមឧទ្ទាមប្រដាប់អាវុធ៕