(ហ្សឺណែវ)៖ អង្គការសហប្រជាជាតិ (UN) បានព្រមានថា សកម្មភាពថ្មីៗរបស់អ៉ីស្រាអែល ប្រឆាំងទីភ្នាក់ងារជួយភៀសខ្លួនប៉ាឡេស្ទីន UNRWA ជាការប្រថុយនឹងផលប៉ះពាល់ដល់មនុស្សរាប់លាននាក់ ជុំវិញការផ្តល់សេវាមូលដ្ឋានដូចជាការអប់រំ និងការថែទាំសុខភាព។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី៣១ ខែធ្នូ ឆ្នាំ ២០២៥។

សភាអ៉ីស្រាអែល កាលពីថ្ងៃចន្ទ បានអនុម័តច្បាប់ដែលដកហូតសិទ្ធិការទូតរបស់ទីភ្នាក់ងារ UNRWA ជាផ្លូវការ និងរារាំងក្រុមហ៊ុនអ៉ីស្រាអែលពីការផ្តល់ទឹក ឬអគ្គិសនីដល់ស្ថាប័ននៃទីភ្នាក់ងារនេះ។ តាម UNRWA ច្បាប់នេះនឹងធ្វើឱ្យអាជ្ញាធរអ៉ីស្រាអែល កាន់តែមានអំណាចលើការដកហូតទ្រព្យសម្បត្តិរបស់ UNRWA ដែលមានស្នាក់ការនៅទីក្រុង East Jerusalem រួមទាំងទីស្នាក់ការកណ្តាល និងមជ្ឈមណ្ឌលបណ្តុះបណ្តាលវិជ្ជាជីវៈសំខាន់ៗ។

លោក Philippe Lazzarini ប្រធាន UNRWA បានចាត់ទុកថាវាជាយុទ្ធនាការជាប្រព័ន្ធ ដើម្បីបង្ខូចកិត្តិយស UNRWA និងរារាំងតួនាទីស្នូលនៃទីភ្នាក់ងារមួយ ដែលបានដើរតួផ្តល់ជំនួយ អភិវឌ្ឍធនធានមនុស្ស និងផ្តល់សេវាកម្មដល់ជនភៀសខ្លួនប៉ាឡេស្ទីន។ លោក Filippo Grandi ប្រធានទីភ្នាក់ងារជនភៀសខ្លួន UNHCR និងជាអតីតប្រធាន UNRWA ក៏បានសម្តែងការខកចិត្តចំពោះចំណាត់ការនេះផងដែរ។

គួរបញ្ជាក់ថា អ៉ីស្រាអែល បានចោទប្រកាន់ UNRWA ថាបានជួយបិទបាំងឱ្យក្រុមសកម្មប្រយុទ្ធហាម៉ាស ជាមួយការអះអាងថាបុគ្គលិក UNRWA មួយចំនួន បានចូលរួមក្នុងការវាយប្រហារថ្ងៃទី៧ ខែតុលា ឆ្នាំ ២០២៣ របស់ក្រុមនេះលើប្រទេសអ៉ីស្រាអែល ដែលបង្កឱ្យមានសង្រ្គាមនៅហ្កាហ្សា៕