(ព្រុចសែល)៖ សហភាពអឺរ៉ុប (EU) បានព្រមាននៅថ្ងៃពុធនេះថា ការគំរាមកំហែងរបស់អ៊ីស្រាអែលក្នុងការផ្អាកអង្គការជំនួយជាច្រើននៅតំបន់ហ្គាហ្សាចាប់ពីខែមករា នឹងរារាំងជំនួយ «សង្គ្រោះជីវិត» មិនឱ្យទៅដល់ដៃប្រជាជនដែលកំពុងត្រូវការចាំបាច់។ នេះបើតាមការចេញផ្សាយ ដោយទីភ្នាក់ងារសារព័ត៌មាន AFP។

លោកស្រី ហាដចា ឡាហ៍ប៊ីប (Hadja Lahbib) ប្រធានផ្នែកមនុស្សធម៌ EU បានសរសេរនៅលើបណ្តាញសង្គម X ថា «EU បានបញ្ជាក់ច្បាស់ហើយថា ច្បាប់ចុះបញ្ជីអង្គការក្រៅរដ្ឋាភិបាល (NGO) មិនអាចអនុវត្តក្នុងទម្រង់បច្ចុប្បន្នបានទេ...ច្បាប់មនុស្សធម៌អន្តរជាតិមិនទុកកន្លែងសម្រាប់ការសង្ស័យទេ។ ជំនួយត្រូវតែទៅដល់អ្នកដែលត្រូវការ»។

ការព្រមាននេះធ្វើឡើងបន្ទាប់ពីអាជ្ញាធរអ៊ីស្រាអែលបានប្រកាសថា អង្គការដែលបដិសេធមិនបញ្ជូនបញ្ជីឈ្មោះបុគ្គលិកប៉ាឡេស្ទីនរបស់ពួកគេ ដើម្បីត្រួតពិនិត្យទំនាក់ទំនងភេរវកម្ម នឹងត្រូវដកហូតអាជ្ញាប័ណ្ណនៅថ្ងៃទី១ មករា ហើយត្រូវបញ្ឈប់សកម្មភាពនៅត្រឹមថ្ងៃទី១ មីនា។ អ៊ីស្រាអែលបានចោទប្រកាន់ចំៗទៅលើអង្គការវេជ្ជបណ្ឌិតគ្មានព្រំដែន (MSF) ថាបានជួលបុគ្គលដែលមានទំនាក់ទំនងជាមួយក្រុមប្រដាប់អាវុធ។

អង្គការសហប្រជាជាតិ និង NGO បានលើកឡើងថា បច្ចុប្បន្នមានរថយន្តដឹកជំនួយតែ ១០០ ទៅ ៣០០គ្រឿងប៉ុណ្ណោះដែលចូលហ្គាហ្សាក្នុងមួយថ្ងៃ ខណៈកិច្ចព្រមព្រៀងបទឈប់បាញ់កំណត់ចំនួន ៦០០គ្រឿង។ ទោះជាយ៉ាងណា អ៊ីស្រាអែលអះអាងថាខ្លួនបានអនុញ្ញាតឱ្យចូលជាមធ្យម ៦០០គ្រឿងក្នុងមួយថ្ងៃ៕