(ប៉េកាំង)៖ ប្រធានាធិបតីចិន លោក ស៊ី ជីនពីង បានសន្យានៅថ្ងៃពុធនេះថា នឹងដាក់ចេញនូវគោលនយោបាយម៉ាក្រូសេដ្ឋកិច្ចដែល «សកម្មជាងមុន» នៅឆ្នាំ២០២៦ ដើម្បីជំរុញកំណើនសេដ្ឋកិច្ច។ លោកក៏បានបញ្ជាក់ដែរថា ប្រទេសចិនកំពុងស្ថិតនៅលើគន្លងត្រឹមត្រូវដើម្បីសម្រេចបានគោលដៅកំណើនសេដ្ឋកិច្ចប្រហែល ៥% សម្រាប់ឆ្នាំនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសារលិខិតជូនពរឆ្នាំថ្មីតាមទូរទស្សន៍រដ្ឋ CCTV លោក ស៊ី បានលើកឡើងថា ផលិតផលក្នុងស្រុកសរុប (GDP) របស់ចិនត្រូវបានគេរំពឹងថានឹងកើនដល់ ១៤០ទ្រីលានយន់ (ប្រហែល ២០ទ្រីលានដុល្លារអាមេរិក) នៅឆ្នាំនេះ ដោយវិស័យការពារជាតិ និងវិទ្យាសាស្ត្របច្ចេកវិទ្យាបានឈានដល់កម្រិតថ្មីមួយ។

ទោះបីជាសេដ្ឋកិច្ចចិនប្រឈមមុខនឹងសម្ពាធពីសង្គ្រាមពាណិជ្ជកម្មជាមួយសហរដ្ឋអាមេរិក វិបត្តិអចលនទ្រព្យ និងការធ្លាក់ចុះនៃការប្រើប្រាស់ក្នុងស្រុកនៅឆមាសទីពីរនៃឆ្នាំ២០២៥ ក៏ដោយ ក៏លោក ស៊ី បានអះអាងថា សេដ្ឋកិច្ចនៅតែបង្ហាញពីភាពធន់ដ៏រឹងមាំ។

លោកប្រធានាធិបតីចិន មិនបានបញ្ចេញគោលនយោបាយជាក់លាក់ណាមួយទេ ប៉ុន្តែបានប្តេជ្ញាថានឹងធ្វើឱ្យប្រសើរឡើងនូវគុណភាពសេដ្ឋកិច្ច ខណៈរក្សា «កំណើនសមហេតុផល» និងបន្តជំរុញគោលដៅ «វិបុលភាពរួម» ព្រមទាំងរក្សាសុខដុមរមនាសង្គម៕