(តេហេរ៉ង់)៖ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍នៅថ្ងៃពុធនេះថា ក្រុមអ្នកតវ៉ាបានព្យាយាមវាយសម្រុកចូលអគាររដ្ឋាភិបាលមូលដ្ឋានមួយកន្លែងនៅក្នុងទីក្រុង Fasa ខេត្ត Fars ភាគខាងត្បូងប្រទេស។ នេះគឺជាថ្ងៃទី៤ ហើយនៃបាតុកម្មប្រឆាំងនឹងការឡើងថ្លៃទំនិញ និងការធ្លាក់ចុះតម្លៃរូបិយប័ណ្ណ ដែលបានរីករាលដាលពីទីក្រុងតេហេរ៉ង់ទៅកាន់តំបន់ផ្សេងទៀត។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP។

អភិបាលក្រុង Fasa បានទទួលស្គាល់ថា ការតវ៉ានេះបង្កឡើងដោយបញ្ហាអតិផរណា និងស្ថានភាពសេដ្ឋកិច្ច ប៉ុន្តែបានចោទប្រកាន់ថាមាន «បុគ្គលដែលទទួលឥទ្ធិពលពីបណ្តាញអរិភាព» ចូលរួម។ អាជ្ញាធរបានចាប់ខ្លួនមេដឹកនាំនៃក្រុមអ្នកតវ៉ាដែលជាស្ត្រីវ័យ ២៨ឆ្នាំម្នាក់ រួមទាំងមនុស្ស ៤នាក់ផ្សេងទៀត ខណៈកងកម្លាំងសន្តិសុខ ៣នាក់បានរងរបួស។

ឆ្លើយតបនឹងស្ថានការណ៍នេះ រដ្ឋាភិបាលអ៊ីរ៉ង់បានប្រកាសជំហរមិនធម្មតាមួយ ដោយសន្យាបង្កើត «យន្តការសន្ទនា» ជាមួយតំណាងអ្នកតវ៉ា ជាជាងការបង្ក្រាបដោយហិង្សាដូចពេលមុនៗ។

គួរបញ្ជាក់ថា សេដ្ឋកិច្ចអ៊ីរ៉ង់កំពុងជួបវិបត្តិយ៉ាងធ្ងន់ធ្ងរ ដោយរូបិយប័ណ្ណរីអាល (Rial) បានធ្លាក់ចុះតម្លៃជិតពាក់កណ្តាលធៀបនឹងដុល្លារក្នុងឆ្នាំ២០២៥ ហើយអត្រាអតិផរណាបានកើនដល់ ៤២.៥% កាលពីខែធ្នូ ក្រោមទណ្ឌកម្មអន្តរជាតិ៕