(តៃប៉ិ)៖ មេដឹកនាំតៃវ៉ាន់ លោក Lai Ching-te នៅថ្ងៃព្រហស្បតិ៍ ទី១ ខែមករា បាននិយាយថាកោះតៃ​វ៉ាន់មានការប្ដេជ្ញាចិត្តដើម្បីការពារអធិបតេយ្យរបស់ខ្លួន ហើយពង្រឹងសមត្ថភាពការពារជាតិ បន្ទាប់ពីចិនធ្វើសមយុទ្ធយោធាជុំវិញកោះតៃវ៉ាន់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសុន្ទរកថាអបអរសាទរឆ្នាំថ្មីផ្សាយចេញពីការិយាល័យមេដឹកនាំតៃវ៉ាន់ ក្នុងទីក្រុងតៃប៉ិ លោក Lai បានលើកឡើងថាសហគមន៍អន្តរជាតិកំពុងតាមមើលថាតើប្រជាជនតៃវ៉ាន់មានការប្ដេជ្ញាចិត្ត ដើម្បីការពារខ្លួនឯងឬក៏យ៉ាងណា? លោក Lai បានគូសបញ្ជាក់ថា «ក្នុងនាមជាប្រធានាធិបតី ខ្ញុំតែងតែបញ្ជាក់យ៉ាងច្បាស់ពីជំហររបស់ខ្ញុំ ដើម្បីការពារដាច់ខាតនូវអធិបតេយ្យជាតិ និងពង្រឹងសមត្ថភាពការពារជាតិ»។ លោកបន្តថាតៃវ៉ាន់ចាំបាច់ត្រូវតែបង្កើនកញ្ចប់ថវិកាយោធា ជាមួយការជំរុញឱ្យគណបក្សប្រឆាំងគាំទ្រផែនការរបស់លោកក្នុងការជំរុញការចំណាយរបស់តៃវ៉ាន់ លើកញ្ចប់ថវិកាយោធា ៤០ពាន់លានដុល្លារ ជាសំណើមួយដែលកំពុងជាប់គាំងក្នុងរដ្ឋសភាជាទីដែលក្រុមគណបក្សប្រឆាំងតៃវ៉ាន់កំពុងក្ដាប់សំឡេងភាគច្រើន។

គួរបញ្ជាក់ថា លោក Lai ក៏បានលើកឡើងផងដែរអំពីការព្រមានដែលថាលោកប្រធានាធិបតី ស៊ី ជីនពីង បានចេញបញ្ជាឱ្យយោធាចិនត្រៀមលក្ខណៈឱ្យបានរួចរាល់ដើម្បីវាយយកតៃវ៉ាន់ នៅឆ្នាំ២០២៧។ ដូច្នេះសម្រាប់លោក Lai ឆ្នាំ២០២៦នឹងក្លាយជាពេលវេលាដ៏សំខាន់មួយសម្រាប់តៃវ៉ាន់ ហើយតៃវ៉ាន់ត្រូវតែត្រៀមផែនការសម្រាប់ស្ថានការណ៍អាក្រក់ ប៉ុន្តែលោកនៅតែសង្ឃឹម សម្រាប់រឿងល្អៗ៕