(សេអ៊ូល)៖ កូនស្រីរបស់មេដឹកនាំកូរ៉េខាងជើង លោក គីម ជុងអ៊ុន មានឈ្មោះថា Ju Ae ដែលត្រូវបានគេប្រមើលមើលថាអាចនឹងក្លាយជាអ្នកស្នងតំណែងពីរូបលោក បានអមដំណើរឪពុក និងម្ដាយដោយធ្វើដំណើរទស្សនកិច្ចជាសាធារណៈលើកដំបូងបំផុតរបស់នាងទៅកាន់វិមានបូជនីយដ្ឋាន Kumsusan ដើម្បីគោរពវិញ្ញាណក្ខន្ធដល់អតីតមេដឹកនាំរបស់កូរ៉េខាងជើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters ដោយផ្អែកលើប្រព័ន្ធផ្សព្វផ្សាយរដ្ឋកូរ៉េខាងជើង។

ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានបញ្ចេញរូបភាពនៃដំណើរទស្សនកិច្ចខាងលើនៅថ្ងៃសុក្រ ទី២ ខែមករា។ កូនស្រីលោក គីម ជុងអ៊ុន ឈ្មោះ Ju Ae បានបង្ហាញខ្លួនកាន់តែ ច្រើនឡើងតាមកញ្ចក់ទូរទស្សន៍រដ្ឋ ក្នុងពេល៣ឆ្នាំចុងក្រោយនេះដោយធ្វើឱ្យក្រុមអ្នកវិភាគខ្លះ និងទីភ្នាក់ងារស៊ើបការណ៍សម្ងាត់កូរ៉េខាងត្បូងសង្ស័យថាក្មេងស្រីរូបនេះប្រហែលជាត្រូវបាន ជ្រើសរើសជាអ្នកស្នងតំណែងបន្តពីលោក គីម ជុងអ៊ុនក្លាយជាមេដឹកនាំជំនាន់ទី៤នៃគ្រួសារគីម នៅពេលអនាគត។

តាម KCNA លោក គីម ក៏ត្រូវបានអមដំណើរផងដែរដោយភរិយា និងមន្ត្រីជាន់ខ្ពស់កូរ៉េខាងជើងជាច្រើននាក់ ក្នុងដំណើរទស្សនកិច្ចកាលពីថ្ងៃទី១ ខែមករា ទៅកាន់វិមានបូជនីយដ្ឋាន Kumsusan។ Kim Ju ‍Ae ដែលត្រូវបានគេជឿជាក់ថាបានកើតនៅដើមទសវត្សរ៍ឆ្នាំ២០១០ ក៏បានចូលរួមក្នុងពិធីអបអរសាទរឆ្នាំថ្មីជាមួយ លោក គីម ជុងអ៊ុនផងដែរកាលពី ថ្ងៃព្រហស្បតិ៍។ កាលពីខែកញ្ញា ឆ្នាំមុនវិញ នាងបានអមដំណើរឪពុកក្នុងដំណើរទស្សនកិច្ចទៅកាន់ប្រទេសចិនហើយដែលនេះជាដំណើរទស្សនកិច្ចនៅក្រៅប្រទេសលើកដំបូងបំផុត របស់នាង។

ដំណើរទស្សនកិច្ចរបស់លោក គីម ជុងអ៊ុន ទៅកាន់វិមាន Kumsusan ដើម្បីគោរពវិញ្ញាណក្ខន្ធជីតា គឺលោក គីម អ៊ីលស៊ុង និងឪពុកគឺលោក គីម ជុងអ៊ីល ក្នុងថ្ងៃដ៏សំខាន់ និងខួបអនុស្សាវរីយ៍ធ្វើឡើងក្នុងចេតនាបង្ហាញពីអំណាចគ្រួសារត្រកូលគីមដែលកំពុងគ្រប់គ្រងកូរ៉េខាងជើងជារដ្ឋប្រដាប់ដោយអាវុធនុយក្លេអ៊ែរ។ កូរ៉េខាងជើងមិនដែលបញ្ជាក់ថាតើកូនស្រី របស់លោក គីម មានអាយុប៉ុន្មានហើយនោះទេ៕